Özbəkistan və SOCAR enerji sahəsində əməkdaşlığı genişləndirir
Tərəflər tərəfdaşlığın dərinləşdirilməsinə və strateji təşəbbüslərin, o cümlədən Ustyurt platosunda karbohidrogen yataqlarının işlənilməsi daxil olmaqla, sürətləndirilməsinə hazır olduqlarını təsdiqləyiblər.
Tünzalə Məlikova1 dəq oxunuş
Özbəkistanın investisiya, sənaye və ticarət naziri Laziz Kudratov Azərbaycan Respublikası Dövlət Neft Şirkətinin (SOCAR) prezidenti Rövşən Nəcəf ilə danışıqlar aparıb. Görüş zamanı tərəflər iki ölkə arasında ticarət-iqtisadi və investisiya tərəfdaşlığının cari vəziyyətini və genişləndirilməsi perspektivlərini müzakirə ediblər.
Əsas diqqət cari birgə layihələrin praktiki icrasına, həmçinin enerji və sənaye sektorlarında yeni təşəbbüslərin işlənilməsinə yönəldilib. Danışıqların yekununda tərəflər qarşılıqlı ticarət həcmini artırmaq və strateji layihələrin irəliləyişini sürətləndirmək niyyətlərini təsdiqləyiblər.
Əməkdaşlığın mərkəzi istiqamətlərindən biri investisiya həcmi 2 milyard dollar qiymətləndirilən Ustyurt platosunda karbohidrogenlərin mənimsənilməsi layihəsidir. 24 iyul 2025-ci il tarixində Özbəkistanın Energetika Nazirliyi, SOCAR və "Özbəkneftqaz" şirkəti Məhsulun Pay Bölgüsü haqqında Saziş (MPBS) imzalayıblar.
Sənəd altı investisiya bloku üzrə geoloji kəşfiyyatı və karbohidrogenlərin hasilatını əhatə edir: Boyterak, Terenkuduk, Birqori, Xaroy, Qaraqalpaq və Kulboy. SOCAR geoloji kəşfiyyat mərhələsində operator qismində çıxış edir. Saziş ən azı 1000 kvadrat kilometr sahədə 3D seysmik kəşfiyyatın aparılmasını, həmçinin ilk beş il ərzində ən azı bir kəşfiyyat quyusunun qazılmasını nəzərdə tutur.
Proqnozlara görə, bu bloklarda potensial ehtiyatlar 100 milyon ton neft və 35 milyard kubmetr təbii qaza çata bilər. Layihə işə düşdükdən sonra Ustyurt platosunda illik neft hasilatının 5 milyon tona qədər olacağı gözlənilir.
Mənbə: report.az
