Niderlandda qaçqınların yerləşdirilməsi üçün yüzlərlə yer çatışmır

Niderlandda sığınacaq axtaranların yerləşdirilməsi üçün yüzlərlə yer çatışmır, ölkənin şimalındakı Ter-Apel şəhərində yerləşən ən böyük qaçqın qəbulu mərkəzini isə yeni böhran gözləyir. Bu barədə Qaçqın Qəbulu üzrə Mərkəzi Agentlik (COA) məlumat verib.

«Sığınacaq axtaranların təcili yerləşdirilməsinə və status sahibləri üçün bələdiyyələrdə müvəqqəti, çevik mənzillərə kəskin ehtiyac var», — deyilir agentliyin bəyanatında.

Həddindən artıq yüklənmiş Ter-Apel

Əlavə yardım olmadan Ter-Apel şəhərində yerləşdirmə və hər hansı xidmət gözləyən insanların sayı sürətlə artır. Qəbul mərkəzində hətta ən həssas sığınacaq axtaranların — uşaqların, qadınların və tibbi problemləri olan insanların yerləşdirilməsi getdikcə çətinləşir.

Qırmızı Xaç tərəfindən gözləyən yer axtaranlar üçün ayrılan əlavə təcili yerləşdirmə yerləri artıq doludur.

«Hazırda yerləşdirmə üçün yüzlərlə yer kəskin şəkildə çatışmır və qış aylarına qədər bu çatışmazlıq yalnız artacaq», — deyilir qurumun bəyanatında.

Çatışmazlığın səbəbləri

COA-nın məlumatına görə, problem ölkəyə gələnlərin sayının artması ilə deyil, insanların müvəqqəti yerləşdirmə mərkəzlərində çox uzun müddət gözləməsi ilə bağlıdır. Səbəblər arasında Miqrasiya və Vətəndaşlıq Xidmətində (IND) və məhkəmələrdə uzun sürən prosedurlar, həmçinin yaşayış icazəsi almış şəxslər üçün bələdiyyələrdə mənzil çatışmazlığı göstərilir.

Rəsmilərin məlumatına görə, qaçqınların yerləşdirilməsi mərkəzləri aylardır 100%-dən çox yüklə işləyir. Problem xüsusilə qış ərəfəsində özünü göstərə bilər: artıq əlavə təcili yerləşdirmə yerlərinə və mövcud müvəqqəti obyektlərin saxlanmasına ehtiyac var.

May ayının sonunda Qaçqın Qəbulu üzrə Mərkəzi Agentlik (COA) Niderlandın ən böyük qaçqın qəbulu mərkəzinin — Qroningen əyalətinin Ter-Apel şəhərində yerləşən mərkəzin həddindən artıq yüklənməsi səbəbindən artıq yeni insanları qəbul edə bilməyəcəyini bildirmişdi.

Mənbə: ria.ru

Materialı hazırladı:Yulduz Səlimov