Aleksandr Van Meta-nı yenidən “cool” etmək istəyirdi — memlər onun planının bir hissəsi idi
Meta-nın baş AI direktoru Aleksandr Van X-də yeni Muse AI assistantı haqqında memlərinin daha geniş məqsədin — şirkəti yenidən "cool" etməyin bir hissəsi olduğunu bildirib. Onun sözlərinə görə, paylaşımlar tətbiqin artımına təsir edib.
Qurban Qurbanzadə2 dəq oxunuş
Meta-nın AI rəhbəri şirkəti yenidən “cool” etmək üçün memlər paylaşdığını açıqlayıb
Meta-nın süni intellekt üzrə rəhbəri Aleksandr Van yeni Muse AI köməkçisinin tanıdılması üçün sosial şəbəkələrdə memlər paylaşmasının daha geniş strategiyanın bir hissəsi olduğunu bildirib. Onun sözlərinə görə, məqsəd Meta-nın ictimai imicini yeniləmək və şirkəti yenidən texnologiya dünyasının diqqət mərkəzinə gətirməkdir.
29 yaşlı top-menecer bu barədə podkaster Devid Senrə müsahibəsində danışıb.
Vanın sözlərinə görə, yeni memlər haqqında düşünmək bəzən hətta iş görüşləri zamanı da diqqətini yayındırırdı. O, maraqlı hesab etdiyi paylaşımları dərhal sosial şəbəkədə yayımlamaq istəyirdi.
“Mən sadəcə mem barədə düşünür və özümə deyirdim: ‘Aman Tanrım, bunu paylaşmalıyam’”, – deyə Van bildirib.
O, həmkarlarının paylaşımları ətrafında yaranan ajiotaja bir qədər təəccübləndiklərini də qeyd edib. Bununla belə, Van hesab edir ki, bu yanaşma məhsulun tanınmasına və istifadəçilərin marağının artmasına müsbət təsir göstərib.
“Bu, həqiqətən artıma təsir etdi. Bu, kifayət qədər əyləncəli idi”, – deyə o vurğulayıb.
Vanın fikrincə, Instagram və Facebook kimi geniş istifadəçi auditoriyasına malik platformalara sahib olmasına baxmayaraq, Meta uzun müddət texnologiya dünyasında “cool” şirkət imicinə malik olmayıb. O, internet mühitində risk etməyin və fərqli yanaşmalar sınamağın mükafatlandırıldığını xatırladaraq, spontan paylaşımların da bu strategiyanın tərkib hissəsi olduğunu bildirib.
Muse AI köməkçisi sentyabrın 8-də istifadəyə verilib. Təqdim olunan məlumata görə, tətbiq 10 gün sonra Apple App Store-un reytinqində ChatGPT-ni geridə qoyaraq zirvəyə yüksəlib.
Meta-nın məlumatına əsasən, Muse istifadəçilərə məlumat axtarmaq, formaları doldurmaq, internet üzərindən alış-veriş etmək, restoranlarda masa bron etmək və ev heyvanları üçün baxıcı tapmaq kimi işlərdə kömək edir. Tətbiq, həmçinin e-poçt, təqvimlər, Spotify, Instagram və OpenTable daxil olmaqla müxtəlif xidmətlərlə inteqrasiya imkanları təqdim edir.
Muse-nin uğuru Meta-nın süni intellekt sahəsində mövqelərini gücləndirmək cəhdləri fonunda diqqət çəkir. Şirkətin əvvəlki Llama və Spark modelləri OpenAI və Anthropic kimi rəqiblərin məhsulları ilə müqayisədə eyni səviyyədə istifadəçi marağı yarada bilməmişdi.
Muse-nin üstünlüklərindən biri Meta-nın artıq Instagram və Facebook vasitəsilə milyardlarla potensial istifadəçiyə çıxış imkanının olmasıdır. Bu geniş auditoriya yeni süni intellekt məhsulunun tanıdılmasını və yayılmasını asanlaşdıra bilər.
Vanın sosial şəbəkələrdəki fəallığı da texnologiya sektorunda diqqət çəkib. Süni intellekt agentləri arasında rəqabətin gücləndiyi bir vaxtda onun daha sərbəst və qeyri-rəsmi ünsiyyət tərzi xüsusilə gənc texnologiya auditoriyasının marağına səbəb olub.
“Bu, çox əyləncəli idi. Xüsusilə çox düşünmədən, sadəcə ‘Nə olsun, paylaşıram’ deyərək yayımladığım bir neçə tvit var idi”, – deyə Van əlavə edib.
Mənbə: businessinsider.com
