Avropa Komissiyası Ukraynada sülh olsa belə rus qazının idxalını dayandırmağı nəzərdə tutur

Avropa Birliyi Rusiya ilə Ukrayna arasında sülh sazişi bağlansa belə, 2027-ci ildə qüvvəyə minəcək rus enerji daşıyıcılarının idxalına qoyulan qadağanı qüvvədə saxlayacaq. “Vedomosti” iqtisadi qəzetinin Vyana nəşri 444.hu-ya istinadən yaydığı məlumata görə, bunu enerji üzrə Avropa komissarı Dan Yorgensen bildirib.

Dan Yorgensen mövzu ilə bağlı açıqlamasında qeyd edib: “Əgər sabah sülh gəlsə belə, Rusiyaya tam etibar etməzdim, nəyə ümid etdiyimizi isə hamımız bilirik”.

O, Macarıstanın Baş naziri mövzusuna toxunaraq bildirib ki, münaqişə başa çatdıqdan sonra Rusiya qazının alışlarına yenidən qayıdıla bilər, çünki bu yanacaq daha ucuzdur. Lakin buna baxmayaraq, Avropanın enerji idxalından asılılığa görə hələ də zəif olaraq qaldığı vurğulanır.

Avropa komissarının sözlərinə görə, qarşıdakı qış mövsümü çətin keçə bilər: dünya bazarlarının qeyri-sabitliyi və yanacaq çatışmazlığı qiymətlərin artmasına səbəb ola bilər. Uzunmüddətli perspektivdə isə Aİ bərpa olunan enerjini, atom enerjisini və elektrifikasiyanı inkişaf etdirmək niyyətindədir.

Rusiyadan qaz idxalının qadağan olunmasına qarşı çıxan əsas ölkələrdən biri Slovakiyadır. Oktyabrın 26-da Slovakiya parlamentinin vitse-spikeri Tibor Qaşpar ölkənin bu qərarı Avropa Komissiyasında mübahisələndirməyə çalışdığını bildirib. Onun sözlərinə görə, Bratislava hesab edir ki, Aİ-nin enerji siyasəti ayrı-ayrı ölkələrin xüsusiyyətlərini nəzərə almalı və onların iqtisadiyyatına həddindən artıq yük yaratmamalıdır.

Xatırladaq ki, bundan əvvəl – oktyabrın 6-da Avropa Komissiyasının sədri Ursula fon der Lyayen Aİ ölkələrinə rus qazının idxalının 45%-dən 12%-ə endiyini, ilin sonuna qədər isə 0%-ə düşəcəyini açıqlamışdı. O qeyd etmişdi ki, 2022-ci ildə qəbul edilən qərarlar sayəsində artıq Aİ daha az həssas vəziyyətdədir.

Mənbə: vedomosti.ru

Materialı hazırladı:Yulduz Səlimov