BƏƏ süni intellektdən istifadədə dünyada liderdir – əhalinin 73,3 faizi generativ süni intellektdən istifadə edir
Microsoft-un 2026-cı ilin ikinci rübü üzrə hesabatına görə, BƏAO-da işləyən əhalinin 73,3%-i orta göstərici olan 18,8% ilə müqayisədə süni intellektdən istifadə edir.

Birləşmiş Ərəb Əmirlikləri generativ süni intellektdən istifadə səviyyəsinə görə dünyada ilk pillədə qərarlaşıb.
“Sky News Arabia”nın məlumatına görə, ölkədə 15-64 yaş aralığındakı əhalinin 73,3 faizi 2026-cı ilin ikinci rübündə ən azı bir generativ süni intellekt məhsulundan istifadə edib.
Məlumatlar “Microsoft AI Economy Institute”un “Global AI Diffusion” hesabatına əsaslanır. Araşdırmada süni intellektdən istifadə göstəricisi 15-64 yaş arasında olan insanların hesabat dövründə generativ süni intellekt məhsulundan istifadə edib-etməməsi əsasında müəyyənləşdirilir. Hesablama anonimləşdirilmiş və ümumiləşdirilmiş Microsoft telemetriya məlumatları əsasında aparılıb, həmçinin internetə çıxış, cihaz bazarı və əhali göstəricilərindəki fərqlər nəzərə alınıb.
Reytinqdə ikinci yerdə Sinqapur qərarlaşıb. Bu ölkədə 15-64 yaşlı əhalinin 64,3 faizi generativ süni intellektdən istifadə edib. Beləliklə, BƏƏ ilə ikinci pillədəki Sinqapur arasında təxminən 9 faiz bəndi fərq yaranıb.
İlk onluqda daha sonra İrlandiya 49,9 faizlə üçüncü, Fransa 49,6 faizlə dördüncü, Norveç isə 49,4 faizlə beşinci yerdədir. İspaniyada bu göstərici 45,1 faiz, Yeni Zelandiyada 44,1 faiz, Böyük Britaniyada 43,7 faiz təşkil edib. Niderland və Qətər isə 43,5 faiz göstərici ilə növbəti pillələri bölüşürlər.
BƏƏ-nin göstəricisi son dövrdə sürətlə artıb. Ölkədə generativ süni intellektdən istifadə göstəricisi 2025-ci ilin birinci yarısında 59,4 faiz, həmin ilin ikinci yarısında 64 faiz olub. 2026-cı ilin birinci rübündə göstərici 70,1 faizə yüksəlib və ikinci rübdə 73,3 faizə çatıb.
Müqayisə üçün, 2026-cı ilin ikinci rübündə dünyada 15-64 yaşlı əhalinin generativ süni intellektdən istifadə göstəricisi 18,8 faiz olub. Bu isə BƏƏ-dəki göstəricinin qlobal orta səviyyədən təxminən dörd dəfə yüksək olduğunu göstərir.
BƏƏ-nin yüksək nəticəsi ölkənin süni intellekt sahəsində həyata keçirdiyi dövlət siyasəti ilə də əlaqələndirilir. Ölkə süni intellektin dövlət idarəçiliyində, biznesdə və təhsildə tətbiqini genişləndirmək üçün uzunmüddətli strategiya həyata keçirir.
BƏƏ federal hökumət xidmətlərinin böyük hissəsinin süni intellekt agentləri vasitəsilə həyata keçirilməsini və on minlərlə dövlət əməkdaşının süni intellekt üzrə təlimlərə cəlb edilməsini planlaşdırır.
Süni intellektin təhsil sisteminə inteqrasiyası da ölkənin əsas istiqamətlərindən biridir. BƏƏ-də dövlət məktəblərində süni intellektlə bağlı mövzuların aşağı yaş qruplarından başlayaraq tədris olunması və müəllimlərin bu sahədə hazırlanması nəzərdə tutulur.
Bununla yanaşı, 73,3 faizlik göstərici BƏƏ əhalisinin süni intellektdən nə qədər tez-tez və hansı məqsədlə istifadə etdiyini deyil, insanların hesabat dövründə generativ süni intellekt məhsulundan istifadə edib-etmədiyini göstərir.
Başqa sözlə, bu rəqəm “istifadəçilərin 73,3 faizi hər gün süni intellektdən istifadə edir” anlamına gəlmir. Söhbət 15-64 yaş qrupunda generativ süni intellekt məhsulundan istifadə edən insanların payından gedir.
Bu göstərici BƏƏ-nin süni intellekt sahəsində əldə etdiyi üstünlüyün miqyasını nümayiş etdirir. Ölkədə texnologiyanın gündəlik həyata, təhsilə, biznesə və dövlət idarəçiliyinə inteqrasiyası sürətlənir.
Beləliklə, süni intellekt yarışında BƏƏ artıq yalnız texnologiyaya investisiya yatıran ölkə deyil. Əhalinin generativ süni intellektdən istifadə səviyyəsinə görə ölkə hazırda dünyanın ən qabaqcıl dövlətlərindən biri və qlobal reytinqin lideridir.
Mənbə: skynewsarabia.com





