Bakının üç rayonunda qaz təchizatı müvəqqəti dayandırılacaq
Xətai, Sabunçu və Suraxanı rayonlarının sakinləri təmir işləri və qaz sızmalarının aradan qaldırılması səbəbindən müvəqqəti qaz kəsilməsi ilə üzləşəcəklər.
Tünzalə Məlikova1 dəq oxunuş
Bu gün Bakının bir sıra rayonlarında təbii qazın verilişi müvəqqəti olaraq dayandırılacaq. “Azəriqaz” İstehsalat Birliyindən verilən məlumata görə, məhdudiyyətlər təmir-quraşdırma işlərinin aparılması, aşkar edilmiş qaz sızmalarının aradan qaldırılması, həmçinin qazpaylayıcı şəbəkənin payız-qış mövsümünə hazırlanması ilə bağlıdır.
Qazın verilişi saat 10:00-dan etibarən dayandırılacaq və planlaşdırılan bütün işlər başa çatana qədər davam edəcək. Məhdudiyyətlər paytaxtın Xətai, Sabunçu və Suraxanı rayonlarındakı istehlakçılara şamil olunacaq.
Xətai rayonunda R. Quliyev, İ. Abılov, Sadıqcan küçələri, Zığ şosesi, Cavanşir küçəsi, həmçinin kombinat ərazisində qaz təchizatı məhdudlaşdırılacaq. Sabunçu rayonunda işlər A. Dadaşov, Y. Saratov, M. Kalinin, Ş. Rüstəveli, M. İbrahimov küçələrini və Balaxanı qəsəbəsindəki Fazenda küçəsini əhatə edəcək.
Suraxanı rayonunda müvəqqəti fasilələr Zığ qəsəbəsinə, o cümlədən H. Allahverdiyev, Xanlar, N. Gəncəvi, İ. Süleymanov, R. Göyüşov, S. Həmidov küçələrinə, həmçinin Zığ şosesinin bir hissəsinə təsir edəcək.
Mənbə: az.trend.az
