İdman akrobatikası üzrə dünya çempionatının azərbaycanlı medalçıları vətənə qayıdıblar

İtaliyanın Peşaro şəhərində sentyabrın 24–27-də keçirilən idman akrobatikası üzrə dünya çempionatında qızıl və bürünc medal qazanan azərbaycanlı idmançılar bu gün vətənə qayıdıblar.

İdmançıları Heydər Əliyev adına Beynəlxalq Aeroportda federasiyanın nümayəndələri, ailə üzvləri və media təmsilçiləri qarşılayıblar. Bu barədə Azərbaycan Gimnastika Federasiyası məlumat yayıb.

Anahita Bashiri, Zahra Rashidova və Nazrin Zeyniyevanın tərkibində çıxış edən Azərbaycanın qadın qrupu böyüklər kateqoriyasında mübarizə apararaq balans hərəkətində dünya çempionu olub. Bu, idman akrobatikası tarixində Azərbaycanın qadın qrupunun bu titulu qazandığı ilk hadisədir.

Təsnifat mərhələsində idmançılar 28.330 xalla birinci yeri tutublar. Finalda isə 28.580 xal toplayaraq bütün rəqiblərini qabaqlayıblar.

Murad Rafiyev və Daniel Abbasovdan ibarət kişi cütlüyü də balans hərəkətində fəxri kürsüyə yüksəlib. Təsnifat mərhələsində 28.550 xalla üçüncü yeri tutan idmançılar finalda nəticələrini 28.950 xala çatdıraraq bürünc medal qazanıblar.

Mənbə: trend.az

Materialı hazırladı:Yulduz Səlimov