Media və Yayım Şurası: Azərbaycana qarşı informasiya hücumları güclənir

Azərbaycanın Media və Yayım Şurası İran və Türkiyədən qaynaqlandığı bildirilən məqsədyönlü informasiya hücumlarının gücləndiyini açıqlayıb.

Şuranın məlumatına görə, sözügedən hücumlar əsasən sosial media platformaları, o cümlədən “Telegram” və “TikTok” vasitəsilə həyata keçirilir. Qurum bu cür koordinasiyalı informasiya fəaliyyətlərini pisləyərək onların yaratdığı risklərə diqqət çəkib.

Media və Yayım Şurası hesab edir ki, məqsədyönlü informasiya hücumları informasiya təhlükəsizliyinin qorunması, dövlətlərarası münasibətlərdə qarşılıqlı hörmət və dezinformasiyaya qarşı beynəlxalq əməkdaşlıq prinsipləri ilə uzlaşmır.

Müasir dövrdə sosial şəbəkələrin geniş auditoriyaya sürətlə çıxış imkanı yaratması informasiya mühitində məsuliyyət məsələsini daha da aktuallaşdırır. Xüsusilə, yoxlanılmamış məlumatların yayılması, ictimai rəyin manipulyasiyası və müxtəlif ölkələr arasında gərginlik yarada biləcək məzmunların dövriyyəyə buraxılması informasiya təhlükəsizliyi baxımından ciddi çağırışlar yaradır.

Belə şəraitdə həm media subyektlərinin, həm də sosial şəbəkə istifadəçilərinin məlumatları paylaşmazdan əvvəl onların mənbəyini və etibarlılığını yoxlaması mühüm əhəmiyyət daşıyır. Eyni zamanda, informasiya mühitində dövlətlərin suverenliyinə, qarşılıqlı hörmətə və beynəlxalq əməkdaşlığa əsaslanan yanaşmanın qorunması vacibdir.

Qeyd edək ki, Media və Yayım Şurası koordinasiyalı informasiya hücumlarını pisləyərək bu cür fəaliyyətlərin informasiya təhlükəsizliyinin müdafiəsi və dövlətlərarası münasibətlərdə qarşılıqlı hörmət prinsipləri ilə ziddiyyət təşkil etdiyini vurğulayıb.

Mənbə: oxu.az

Materialı hazırladı:Tünzalə Məlikova