Özbəkistan 2027-ci ildə MDB vergi xidmətləri rəhbərlərinin şurasına sədrlik edəcək

Özbəkistan MDB dövlətlərinin vergi xidmətləri rəhbərlərinin Koordinasiya Şurasına 2027-ci il üçün sədrlik edəcək. Qərar Düşənbedə keçirilən şuranın XXXIII iclasında qəbul edilib. Bu barədə UzDaily.uz xəbər verir.

İclasda iştirakçılar vergi administrasiyasında süni intellektin tətbiqini müzakirə ediblər. Onlar vergi risklərinin idarə olunmasının təkmilləşdirilməsini və vergi administrasiyasının səmərəliliyinin artırılmasını vacib hesab ediblər.

Özbəkistan nümayəndə heyəti vergi sisteminin rəqəmsallaşdırılması və süni intellekt texnologiyalarının tətbiqi təcrübəsini təqdim edib. Avtomatlaşdırılmış vergi administrasiyası üçün həllər, böyük məlumat massivlərinin təhlili, potensial pozuntuların aşkarlanması və vergi ödəyiciləri üçün xidmətin yaxşılaşdırılması nümayiş etdirilib.

Özbəkistan tərəfi “MDB vergi xidmətləri üzrə texnoloji tərəfdaşlıq” təşəbbüsünü irəli sürüb. Təşəbbüs rəqəmli həllərin mübadiləsini, birgə elmi-praktiki tədbirləri, mütəxəssislərin hazırlanması və təlim-staj proqramlarını, habelə süni intellektin tətbiqi üzrə model müddəaların hazırlanmasını nəzərdə tutur. Bundan əlavə, Koordinasiya Şurası çərçivəsində süni intellekt məsələləri üzrə peşəkar iş qrupunun yaradılması təklif olunub.

Vergi risklərinin idarə olunması müzakirə edilərkən Özbəkistan nümayəndələri analitik alətlərin istifadəsi praktikası barədə danışıblar. Bu alətlər potensial pozuntuların vaxtında aşkarlanmasına, büdcə itkilərinin qarşısının alınmasına və vergi ödəyiciləri üzərindəki inzibati yükün azaldılmasına kömək edir.

Mənbə: uzdaily.uz

Materialı hazırladı:Yulduz Səlimov