Səhiyyə Nazirliyi və QHT Agentliyi QHT-lər üçün birgə qrant müsabiqəsi elan edib

Azərbaycan Respublikasının Səhiyyə Nazirliyi və Qeyri-Hökumət Təşkilatlarına Dövlət Dəstəyi Agentliyi (QHT Agentliyi) QİÇS, vərəm və malyariya ilə mübarizə üzrə Qlobal Fondun qrant vəsaiti hesabına QHT-lər üçün birgə qrant müsabiqəsi elan edib.

Layihə təkliflərinin qəbuluna 20 oktyabr 2026-cı ildə başlanacaq, müraciət üçün son tarix isə 10 noyabr 2026-cı ildir. Sənəd qəbulu başa çatdıqdan sonra QHT-lərin layihə təklifləri ekspertizadan keçəcək, təhlil olunacaq, qaliblər müəyyənləşdiriləcək və adları elan ediləcək. Böyük qrant müsabiqəsi üzrə qrant məbləğinin aşağı həddi 30000 manat, yuxarı həddi 70000 manatdır.

Əsas mövzular

Müsabiqənin birinci mövzusu vərəm skrininqidir. Layihə çərçivəsində Bakı şəhəri və regionlarda yaşayan risk qrupuna aid həssas əhali qrupları arasında skrininq aparılacaq. Bu qruplara keçmiş məcburi köçkünlər, vərəm anamnezi olan şəxslər, əmək miqrantları və miqrantların ailə üzvləri daxildir. Hər benefisiar üzrə ən azı üç ailə üzvü nəzərdə tutulub. Skrininq vərəm yayılma səviyyəsi yüksək olan regionlarda həyata keçiriləcək.

Vərəmə şübhəli hallar müəyyən edildikdə şəxslər əlavə diaqnostik müayinələrə və müvafiq dövlət tibb müəssisələrinə yönləndiriləcək. Zərurət yarandıqda sosial xidmətlərə çıxış təmin olunacaq. Layihə komandasına vərəm həkimi, rentgen texniki, ko-infeksiyalar üzrə mütəxəssis, təcrübəli tibb bacısı, radioloq və vərəm xəstələri ilə işləyən iki sosial işçi cəlb ediləcək.

İkinci mövzu vərəmlə bağlı stiqmanın və ayrı-seçkiliyin aradan qaldırılmasına yönəlib. Bakı və regionlarda icma potensialını gücləndirmək məqsədilə insan hüquqlarının müdafiəsi, peyvəndləmə, infeksiyaya nəzarət və fərdi mühafizə vasitələrindən (FMV) istifadə üzrə təlim və maarifləndirmə tədbirləri keçiriləcək. Layihədə Ümumdünya Səhiyyə Təşkilatının icma əsaslı xidmətlər üzrə standartlaşdırılmış paketinin nəzərdən keçirilməsi və yenilənməsi də nəzərdə tutulub.

Seçilmiş altı icma lideri “Təlimçilər üçün təlim (TOT) proqramı”na cəlb olunacaq. Sonrakı mərhələdə onlar həmyaşıd təlimçi kimi vərəm və İİV üzrə maarifləndirmə, məsləhət və psixososial dəstək sessiyaları keçirəcəklər.

Layihə çərçivəsində xəstələrin hekayələrini əhatə edən maarifləndirici məqalə və ya jurnalist araşdırması hazırlanacaq. Ümumdünya Vərəm Gününə həsr olunmuş konfrans təşkil ediləcək, jurnalistlər üçün məlumat kitabçaları və video-reportajlar hazırlanacaq. Vərəmə yoluxmuş şəxslərin hüquqlarının və müalicəyə davamlılığının dəstəklənməsi üçün mövcud xidmətlər təhlil ediləcək və xidmətlər zərfi ilə maliyyələşdirmə təklifi aidiyyəti dövlət qurumlarına təqdim olunacaq. Elmi Tədqiqat Ağciyər Xəstəlikləri İnstitutu ilə əməkdaşlıq çərçivəsində hədəf icmalar üçün tibbi xidmətlərə çıxış, psixoloji dəstək və sosial müavinətlərə müraciət imkanları barədə məlumatlandırma sessiyaları keçiriləcək.

Müraciət qaydası

Nizamnamə məqsədlərində səhiyyə və sağlamlıq, zərərli asılılıqlara qarşı mübarizə profili olmayan QHT-lərin layihələri müsabiqəyə buraxılmır. 2026-cı il üzrə Səhiyyə Nazirliyinin qrant müsabiqələrinin qalibi olan QHT-lərin layihələri də qəbul edilmir.

Müsabiqə üçün 2026-cı il 22 iyun tarixli 188 nömrəli Nazirlər Kabineti qərarı ilə təsdiq edilmiş Qaydaya uyğun sənədlər tələb olunur. Bunlara layihə təklifi, layihənin icra planı, xərclər smetası, büdcənin maliyyə əsaslandırması, QHT-nin nizamnaməsi, qeydiyyat şəhadətnaməsi və hüquqi şəxslərin dövlət reyestrindən çıxarışın surətləri, vergi uçotu şəhadətnaməsinin surəti, səlahiyyətli nümayəndənin şəxsiyyət sənədinin surəti və bank hesabı barədə məlumatlar daxildir. QHT-nin son beş il ərzində fəaliyyətini, layihə və proqramlarını təsdiq edən, media subyektlərində azı 30 fərqli məzmunda yayılmış sənəd də təqdim olunmalıdır.

Layihə təklifləri QHT Agentliyinin elektron xidmətlər portalında (e-ərizə bölməsi) elektron qaydada təqdim olunur. Bu bölmə 20 oktyabr – 10 noyabr 2026-cı il tarixləri arasında aktiv olacaq. Şəxsən, poçtla və ya e-poçtla təqdim olunan sənədlər qəbul edilmir.