Yazıçı Anar parlamentə müraciət etdi: “Tərcümə Mərkəzinə ayrılan büdcə Yazıçılar İttifaqına qaytarılsın”
Azərbaycan Yazıçılar İttifaqının sədri Anar Rzayev İttifaqa əvvəllər Tərcümə Mərkəzinə ayrılmış büdcə vəsaitlərinin qaytarılmasını xahiş edib. O, bu məqsədlə parlamentə müraciət edib.
Qurban Qurbanzadə2 dəq oxunuş
Azərbaycan Yazıçılar İttifaqının sədri, yazıçı Anar Rzayev parlamentdən əvvəllər Tərcümə Mərkəzinə ayrılmış büdcə vəsaitlərinin İttifaqa qaytarılmasına kömək etməsini xahiş edib.
F4media.az xəbər verir ki, Anar Rzayev bu barədə noyabrın 13-də “Prioritetlər, Prezident İlham Əliyevin VII Qlobal Multikulturalizm Forumuna müraciətindən irəli gələn: mədəniyyətlərarası dialoq və mədəni diplomatiya Azərbaycanı” mövzusunda keçirilən ictimai müzakirə zamanı danışıb.
Onun sözlərinə görə, sözügedən vəsaitlər Azərbaycan yazıçılarının əsərlərinin xarici dillərə tərcüməsi və Azərbaycan ədəbiyyatının beynəlxalq səviyyədə təbliği üçün vacibdir.
Anar Rzayev bildirib ki, Tərcümə Mərkəzi Yazıçılar İttifaqından ayrılaraq müstəqil quruma çevrilərkən onun büdcəsi də İttifaqdan ayrılıb. Buna baxmayaraq, Yazıçılar İttifaqı sonrakı dövrdə Tərcümə Mərkəzini öz imkanları hesabına dəstəkləməyə çalışıb.
İttifaq sədrinin sözlərinə görə, bu məqsədlə təşkilatın binasının birinci mərtəbəsi restoran fəaliyyəti üçün icarəyə verilib və əldə olunan vəsaitdən istifadə olunub.
Anar Rzayev parlamentə müraciət edərək əvvəllər Tərcümə Mərkəzinə ayrılan büdcə vəsaitlərinin Yazıçılar İttifaqına qaytarılmasına dəstək göstərilməsini istəyib.
“Biz parlamentə müraciət edirik ki, Tərcümə Mərkəzinə ayrılmış büdcənin Azərbaycan Yazıçılar İttifaqına qaytarılmasını təmin etsin”, – deyə o bildirib.
Yazıçı Anar Azərbaycan ədəbiyyatının xaricdə təbliği və yerli müəlliflərin əsərlərinin beynəlxalq səviyyədə nəşri məsələsinə də toxunub.
O qeyd edib ki, Azərbaycan yazıçılarının əsərlərinin xarici ölkələrdə nəşri yalnız xarici nəşriyyatların təşəbbüsündən asılı olmamalıdır. Anarın fikrincə, Azərbaycan ədəbiyyatının dünya miqyasında tanıdılması istiqamətində işlər ölkə daxilində də sistemli şəkildə aparılmalıdır.
Onun sözlərinə görə, tərcümə və nəşr imkanlarının genişləndirilməsi Azərbaycan ədəbiyyatının xarici auditoriyaya çatdırılması və ölkənin mədəni diplomatiyasının gücləndirilməsi baxımından mühüm əhəmiyyət daşıyır.
Qeyd edək ki, müzakirədə Azərbaycan ədəbiyyatının beynəlxalq səviyyədə təbliği, mədəniyyətlərarası dialoq və mədəni diplomatiya məsələləri ətrafında fikir mübadiləsi aparılıb.
Mənbə: trend.az
