55 könüllü, 11 təhsil müəssisəsi, 1000-dən çox uşaq: “Food Heroes” layihəsi
Qida israfının azaldılması və dayanıqlı istehlak vərdişlərinin təşviqi məqsədilə AIESEC Azerbaijan və Electrolux Food Foundation-ın əməkdaşlığı çərçivəsində həyata keçirilən Global Food Heroes layihəsi Azərbaycanda uğurla başa çatıb. 12-15 oktyabr 2026-cı il tarixlərində keçirilən layihə…

Qida israfının azaldılması və dayanıqlı istehlak vərdişlərinin təşviqi məqsədilə AIESEC Azerbaijan və Electrolux Food Foundation-ın əməkdaşlığı çərçivəsində həyata keçirilən Global Food Heroes layihəsi Azərbaycanda uğurla başa çatıb. 12-15 oktyabr 2026-cı il tarixlərində keçirilən layihə çərçivəsində 55 AIESEC könüllüsü 11 təhsil müəssisəsində 1000-dən çox uşağa qida israfı və məsuliyyətli istehlak mövzularında maarifləndirici təlimlər keçirib.
Layihənin əsas məqsədi uşaqlarda qida resurslarının dəyəri, qida israfının ətraf mühitə təsiri və gündəlik həyatda daha məsuliyyətli istehlak davranışlarının formalaşdırılması barədə məlumatlılığı artırmaq olub. İnteraktiv təlimlər vasitəsilə iştirakçılar qidanın dəyərini anlamaq, resurslardan səmərəli istifadə etmək və daha dayanıqlı gələcək naminə fərdi məsuliyyətlərini dərk etmək imkanı əldə ediblər.
Food Heroes layihəsinin həyata keçirilməsində AIESEC Azerbaijan könüllüləri mühüm rol oynayıblar. Təlimçi kimi fəaliyyət göstərən 50 könüllü əvvəlcədən hazırlıq mərhələsindən keçərək uşaqlarla maarifləndirici sessiyalar keçirib, qida israfının qarşısının alınması ilə bağlı bilik və praktiki yanaşmaları onlarla bölüşüb.
Layihə çərçivəsində Landau School, İdrak, XXI Əsr Beynəlxalq Təhsil və İnnovasiya Mərkəzi, Muzipo, Indigo, Butterfly, Kosmo, Good Luck, Sığınma Evi, Studyland və Trio ilə əməkdaşlıq edilib. Bu əməkdaşlıq maarifləndirici təşəbbüsün müxtəlif təhsil mühitlərində daha geniş auditoriyaya çatmasına imkan yaradıb.
Food Heroes yalnız qida israfı haqqında məlumat verməyi deyil, həm də uşaqlarda gündəlik seçimlərinin nəticələri barədə düşünmək vərdişi formalaşdırmağı hədəfləyib. Qidanın düzgün qiymətləndirilməsi, ehtiyac qədər istehlak və resurslara məsuliyyətli yanaşma kimi sadə davranışlar daha dayanıqlı gələcəyin qurulmasında mühüm əhəmiyyət daşıyır.
Layihə Birləşmiş Millətlər Təşkilatının Dayanıqlı İnkişaf Məqsədlərindən Məqsəd 12 – Məsuliyyətli istehlak və istehsal istiqaməti ilə səsləşərək gənclərin və uşaqların dayanıqlılıq mövzusunda maarifləndirilməsinə töhfə verib.
AIESEC Azerbaijan gənclərin potensialını inkişaf etdirmək və onların cəmiyyətə müsbət təsir göstərməsinə şərait yaratmaq missiyasına uyğun olaraq, Food Heroes vasitəsilə könüllülük fəaliyyətini real sosial təsirlə birləşdirib.
Çünki daha dayanıqlı gələcək böyük dəyişikliklərdən əvvəl kiçik addımlarla başlayır. Bir uşağın qazandığı bilik, bir könüllünün paylaşdığı mesaj və bir ailənin dəyişən gündəlik vərdişi gələcək üçün əhəmiyyətli fərq yarada bilər.














