Fələstinli idmançılar Adidas məhsullarını boykot etdilər

İsrail hücumları nəticəsində əzalarını itirmiş fələstinli idmançılar Adidas şirkətinin məhsullarını tam boykot etdiklərini rəsmən elan ediblər. Etiraza səbəb kimi, keçmiş İsrail hərbçisi Şaliv Bitonun brendin protezi və ya bir ayağı olan insanlar üçün nəzərdə tutulmuş "Single Shoe Service" adlı yerli reklam kampaniyasında iştirakı göstərilib.

Ayağını itirmiş Şaliv Biton, 2021-ci ildə Qəzza zolağında hərbi əməliyyatlarda iştirak edib. Fələstinli atletlər ərəb və islam ölkələrinin idman ictimaiyyətini, eləcə də bütün dünyada bu məsələyə həssas yanaşan insanları onların təşəbbüsünü dəstəkləməyə və bu istehsalçının mallarını almaqdan imtina etməyə çağırıblar.

İsrail snayperinin atəşi nəticəsində sol ayağını itirən futbolçu Əhməd Əbu Nar, reklam kampaniyasının simasının seçilməsini "qurbanlara məhəl qoymamaq və dinc sakinlərə qarşı hərbi cinayətlər törədənlərin imicini yaxşılaşdırmaq üçün qəsdən edilmiş bir cəhd" kimi xarakterizə edib. O, fələstinli idmançıların boykot qərarının qəti olduğunu vurğulayıb.

2006-cı ildə İsrail hücumu zamanı ayağını itirən Fələstin Amputant Futbolçular Assosiasiyasının idarə heyətinin üzvü Həsən Əbu Kərim, keçmiş hərbçinin reklama cəlb edilməsini "irqi ayrı-seçkiliyin çirkin bir forması" adlandırıb.

Yaranan tənqidlər fonunda Adidas şirkəti özünün ərəbdilli Instagram hesabında üzr istəyib. Fələstin tərəfinin məlumatına görə, 2023-cü ilin oktyabrından bəri Qəzza zolağında hücumlar nəticəsində 73 662 nəfər həlak olub, 174 627 nəfər isə yaralanıb.

Ümumdünya Səhiyyə Təşkilatının 2026-cı ilin mayında dərc etdiyi qiymətləndirmələrə görə, 2023-cü ilin oktyabrından bəri Qəzza zolağında 5 161 ilə 6 710 arasında amputasiya halı qeydə alınıb. Ümumilikdə, anklavın təxminən 43 min sakini, o cümlədən 10 minə yaxın uşaq, uzunmüddətli sağlamlıq problemlərinə səbəb ola biləcək xəsarətlər alıb.

Mənbə: aa.com.tr

Materialı hazırladı:Yulduz Səlimov