Qızılağac Milli Parkında brakonyerlər saxlanılıb
Hüquq-mühafizə orqanlarının əməkdaşları Qızılağac Milli Parkında brakonyerliklə məşğul olan beş yerli sakini saxlayıblar. Qayda pozanlardan silah və qadağan olunmuş ov alətləri götürülüb.
Tünzalə Məlikova1 dəq oxunuş
Daxili İşlər Nazirliyinin Su Nəqliyyatında Polis İdarəsinin əməkdaşları Xəzər dənizinin akvatoriyasında, habelə tabelikdə olan qoruq ərazilərində, milli parklarda və su hövzələrində brakonyerliyə qarşı profilaktik tədbirləri davam etdirirlər.
Lənkəran Xətt Polis Şöbəsinin əməkdaşları tərəfindən keçirilən reydlər zamanı Qızılağac Milli Parkının su ərazisində qanunsuz balıq ovladığına görə İ. Əhmədov saxlanılıb. Baxış zamanı ondan müxtəlif növ balıqlar və qadağan olunmuş balıqovlama alətləri aşkarlanaraq götürülüb.
Qoruq ərazisində keçirilən digər tədbirlər zamanı hüquq-mühafizə orqanlarının əməkdaşları daha dörd nəfəri saxlayıblar: E. Eynalov, R. Eynalov, E. Əzizov və İ. Eynalov. Müvafiq sənədləri olmayan həmin vətəndaşlardan dörd ov tüfəngi, habelə «Qırmızı kitab»a daxil edilmiş müxtəlif növ 72 qanunsuz ovlanmış quş götürülüb.
Hazırda aşkarlanmış faktlar üzrə müvafiq araşdırma aparılır. Milli parkın ərazisində qanunsuz ovla məşğul olan şəxslər saxlanılıb, qayda pozucuları barəsində qanunvericilik çərçivəsində tədbirlər görülüb.
Su biomüxtəlifliyinin qorunmasına və ekoloji tarazlığın saxlanılmasına yönəlmiş nəzarət və profilaktika tədbirləri polis tərəfindən aidiyyəti dövlət qurumları ilə birgə həyata keçirilir.
Mənbə: news.milli.az
