Çin yaxın illərdə ABŞ-dən kömür idxalını artırmağı planlaşdırır

Pekin Vaşinqtonla kömür sahəsində əməkdaşlığı dərinləşdirmək, o cümlədən yaxın illərdə ABŞ kömürünün təchizatını artırmaq niyyətindədir. Bu barədə Çin Xarici Ticarət Nazirliyi bəyan edib.

Çin hökumət qurumunun bəyanatına görə, əvvəlki ticarət-iqtisadi məsləhətləşmələrin yekunlarına əsasən Çin və ABŞ amerikalı kömürün idxalının qarşılıqlı tarif endirimi çərçivəsinə daxil edilməsi barədə razılığa gəliblər.

«Çin və ABŞ-ın iqtisadi və ticarət nümayəndə heyətləri Çinin ABŞ-dən kömür idxalına tətbiq etdiyi gömrük rüsumlarının 30 milyard dollara 30 milyard dollar prinsipi üzrə qarşılıqlı tarif endirimi çərçivəsinə daxil edilməsi barədə konsensusa gəliblər», – deyə məlumatda bildirilir.

Qurum bu addımın Çinin ABŞ-dən 2027 və 2028-ci illərdə kömür idxalına töhfə verəcəyini xüsusi vurğulayıb.

«Ümid edirik ki, birgə səylər sayəsində Çinlə ABŞ arasında kömür sahəsində əməkdaşlıq dərinləşməyə davam edəcək, qarşılıqlı fayda və hər iki tərəfin maraqlarına cavab verən nəticələr təmin edəcək», – deyə nazirlikdə əlavə ediblər.

Nazirlikdə qeyd edildiyi kimi, ABŞ kömürünün idxalı Çində daxili kömür bazarına faydalı əlavə olacaq, həmçinin ABŞ-ın kömür sənayesini sabit iqtisadi gəlir və iş yerləri ilə təmin edəcək. Nazirliyin fikrincə, bu, ikitərəfli ticarətin sabitləşməsinə və genişlənməsinə töhfə verəcək.

Əvvəllər Çin və ABŞ arasında keçirilən ticarət-iqtisadi məsləhətləşmələr zamanı tərəflər bir-birinə ümumi dəyəri 30 milyard dollar olan malların idxalına tariflərin qarşılıqlı şəkildə azaldılması barədə razılığa gəliblər. Bununla yanaşı, hər iki tərəfdən müvafiq mallara tətbiq edilən təxminən 90% tarif ən çox imtiyazlı rejim dərəcələri səviyyəsinə endiriləcək.

Mənbə: news.am

Materialı hazırladı:Yulduz Səlimov