Corc Kluni Paramount-ın ittihamlarından sonra Mark Ruffalonu müdafiə edib
Corc Kluni Mark Ruffalonun antisemitizmdə ittiham olunmasını "absurd" adlandıraraq, həmkarının ifadə azadlığı hüququnu dəstəkləyib.
Əbdulrəhman Sadıxlı2 dəq oxunuş
Aktyor və prodüser Mark Ruffalo, studiyanın onu "antisemit stereotiplərdən" istifadə etməkdə ittiham etməsindən sonra Paramount şirkəti ilə ictimai mübahisənin mərkəzində qalıb. Münaqişə Ruffalonun Oracle texnologiya şirkətini tənqid etməsi və onu İsrailin hərbi əməliyyatları ilə əlaqələndirməsi ilə başlayıb. Ruffalo İsrailin hərəkətlərini "soyqırım" kimi xarakterizə edərək, bunların "Oracle tərəfindən dəstəklənən aparteid sistemi" üzərində qurulduğunu bəyan edib.
Ruffalonun tənqidi həmçinin Paramount və Warner Bros. arasında 111 milyard dollarlıq potensial birləşməyə də toxunub. Aktyor, Paramount-un Skydance şirkətinin rəhbəri Devid Ellisonun Donald Trampla olan siyasi əlaqələri ilə bağlı narahatlığını ifadə edib. Buna cavab olaraq Paramount bəyanat yayaraq, "kommersiya mübahisəsi bəhanəsi ilə antisemit stereotiplərdən" istifadə edilməsindən narahat olduğunu bildirib və şirkətin qərəzliliyə dözümsüz olduğunu vurğulayıb.
Mark Ruffalo antisemitizm ittihamlarını "dəhşətli və mahiyyətcə həqiqətə uyğun olmayan" adlandırıb. Avqustun 21-də o, İsrailin baş nazirinin hərəkətlərini və ya hərbi texnologiya müqavilələrini tənqid etməyin yəhudi xalqını tənqid etmək olmadığını bildirib. Onun sözlərinə görə, mövqeyi yəhudilərə qarşı düşmənçilikdən deyil, siyasi əqidəsindən irəli gəlir.
Corc Kluni Variety jurnalına verdiyi müsahibədə Ruffalonu dəstəkləyərək, Paramount-un mövqeyini "absurd" adlandırıb. "Mən ifadə azadlığına inanıram, hətta onunla tamamilə razılaşmasam belə. Bu vacibdir, demokratiyanın işləmə mexanizminin bir hissəsidir", – deyə Kluni bildirib. O, həmçinin Paramount və Warner Bros.-un birləşməsinin maliyyə səmərəliliyinə şübhə ilə yanaşaraq, iri şirkətlərin udulması zamanı kütləvi ixtisarların ola biləcəyindən narahatlığını ifadə edib.
Daha əvvəl Uolles Şon, Hanna Eynbinder, Coel Koen və Naomi Klayn da daxil olmaqla 170-dən çox incəsənət xadimi "Bəsdir!" adlı açıq məktub imzalayaraq, tənqidləri susdurmaq üçün antisemitizm ittihamlarından istifadə edilməsini pisləyiblər. Aktrisa İlana Qleyzer də bəyanatla çıxış edərək, bu cür ittihamları tənqidçiləri susdurmaq üçün təhlükəli bir üsul adlandırıb.
Paramount və Warner Bros. arasındakı saziş, məhkəmənin bu birləşmə ilə bağlı bütün hüquqi məsələlərə baxacaq 2027-ci ilin iyun ayına qədər qeyri-müəyyən vəziyyətdə qalır.
Mənbə: aawsat.com
