Ekspert Netflix-in Donald Trampın Türkiyəyə səfəri haqqında sənədli filmini tənqid edib

Osmaniye Korkut Ata Universitetinin müəllimi, doktor Fatma Yeşilkuş Netflix-in Donald Trampın Esenboğa hava limanından yola düşməsi ilə bağlı yeni sənədli filmini tənqid edib. Ekspertin fikrincə, film türk xüsusi xidmət orqanlarının koordinasiyalı fəaliyyətini görməzdən gələrək və Türkiyənin təhlükəsizlik sistemində guya boşluqlar olduğu barədə yanlış təəssürat yaradaraq vəziyyəti təhrif edir.

Yeşilkuş diqqəti ona çəkib ki, filmdə Trampın uçduğu təyyarə yalnız "yem təyyarə" (decoy) kimi təqdim olunur. Ekspert bu təsviri natamam adlandıraraq, göyərtədə ekipajın, həmçinin eyni reyslə qayıtmalı olan senator Marko Rubionun olduğunu vurğulayıb.

Ekspert filmin qısa istehsal müddətinə xüsusi diqqət yetirib. Onun sözlərinə görə, kontentin 26 gün ərzində hazırlanması istifadə olunan mənbələrin etibarlılığı və obyektivliyi ilə bağlı suallar doğurur. "26 gün ərzində əldə edilən sənədlər nə dərəcədə etibarlıdır, kimlərlə söhbət aparılıb və onlar nə dərəcədə qərəzli olublar? Vacib olan yalnız deyilənlər deyil, həm də gizlədilənlərdir", – deyə Yeşilkuş qeyd edib.

Hadisənin iyulun 8-də baş verdiyini, Trampın isə bu barədə avqustun 10-da şərh verdiyini xatırladan Yeşilkuş, filmin tələsik buraxılmasının müəyyən ictimai rəy formalaşdırmaq məqsədi daşıya biləcəyini vurğulayıb. O əlavə edib ki, filmi birbaşa Türkiyəyə hücum adlandırmaq mümkün olmasa da, o, ölkəni yüksək səviyyəli görüşlər üçün təhlükəsiz olmayan bir yer kimi təqdim edərək beynəlxalq imicinə dolayı yolla təsir göstərir.

Yeşilkuş həmçinin vurğulayıb ki, Türkiyə NATO çərçivəsində öhdəlikləri əsasında mütəmadi olaraq beynəlxalq nümayəndə heyətlərini qəbul edir və bu cür media məhsulları qərəzli qavrayış yaratmaq üçün istifadə oluna bilər. Bu film Netflix seriyasının üçüncü hissəsidir, ilk iki epizod isə digər mövzulara həsr olunmuşdu.

Mənbə: cnnturk.com

Materialı hazırladı:Tünzalə Məlikova