ABŞ kosmosda silah yerləşdirilməsini ilk dəfə rəsmən təsdiqləyib

Amerika Birləşmiş Ştatları kosmik fəzada silah yerləşdirilməsi faktını ilk dəfə rəsmən təsdiqləyib. Müvafiq bəyanatla ABŞ Hərbi Hava Qüvvələri naziri Troy Maynk çıxış edib. Eyni zamanda, qurum rəhbəri söhbətin məhz hansı silah növlərindən getdiyini dəqiqləşdirməyib.

Pentaqonun bəyanatına Rusiya Xarici İşlər Nazirliyi reaksiya verib. Nazirlik vurğulayıb ki, Vaşinqton "orbitdə hər hansı silahlı münaqişənin törədəcəyi fəlakətli nəticələri tamamilə gözardı etməyə" hazır olduğunu nümayiş etdirir.

Rusiya XİN-in rəsmi nümayəndəsi Mariya Zaxarova bildirib ki, ABŞ-ın kosmik təhlükəsizliklə bağlı beynəlxalq təşəbbüsləri yalnız onların öz təcavüzkar niyyətlərindən diqqəti yayındırmağa xidmət edir. O qeyd edib ki, Vaşinqtonun Rusiyanın peyk əleyhinə nüvə silahı hazırlamaq niyyətində olması barədə uydurmaları ABŞ-ın hegemonluq planlarının həyata keçirilməsi üçün bir pərdədir.

Rusiya diplomatik idarəsi kosmosda istənilən silahın yerləşdirilməsinə birbaşa qadağanı da ehtiva edən, kosmosda silahlanma yarışının qarşısını almaq üçün hüquqi cəhətdən məcburi alətin yaradılmasının vacibliyini bəyan edib. Bu təşəbbüsün reallaşdırılması üçün Rusiya BMT Baş Assambleyasının Birinci Komitəsinin baxılmasına müvafiq qətnamə layihələri təqdim edəcək.

Vaşinqtonun hərəkətlərinə Çin XİN də qiymət verib. ÇXR-in xarici siyasət idarəsi Birləşmiş Ştatları kosmik fəzada silahların artırılmasını dayandırmağa çağırıb və vurğulayıb ki, Pekin kosmosun döyüş meydanına çevrilməsinin qətiyyən əleyhinədir.

1967-ci ilin qüvvədə olan Kosmos haqqında Müqaviləsi Yerin orbitində və ya kosmik fəzada kütləvi qırğın silahlarının yerləşdirilməsini qadağan edir. Lakin sənəd adi silahların digər növlərinə birbaşa toxunmur.

Mənbə: ru.sputnik.kz

Materialı hazırladı:Əbdulrəhman Sadıxlı