Argentina Malvin adaları yaxınlığındakı neft layihəsinə görə Böyük Britaniya və İsrail səfirlərini çağırıb

Argentina Xarici İşlər Nazirliyi rəsmi etiraz notalarını şəxsən təqdim etmək üçün Böyük Britaniya və İsrail Dövlətinin səfirlərini çağırıb. Buenos-Ayresin bu addımına səbəb Argentina hakimiyyətinin icazəsi olmadan mübahisəli Malvin (Folklend) adaları bölgəsində "Sea Lion" layihəsinin irəlilədilməsi və neft yataqlarının işlənməsi ilə bağlı hər hansı əlaqədar işlərin aparılması olub.

Keçirilən görüşlər zamanı Argentina tərəfi karbohidrogenlərin kəşfiyyatı və hasilatı sahəsindəki fəaliyyətə etirazını bildirib, həmçinin Britaniya hakimiyyətinin bu ərazidə biznesin aparılması üçün təlimatlar dərc etmək addımlarını tənqid edib.

Argentina XİN-in bəyanatına görə, Böyük Britaniya bu cür tövsiyələrin köməyilə Malvin adalarında, Cənubi Georgiyada, Cənubi Sendviç adalarında və bunlara bitişik dəniz akvatoriyalarında icazəsiz kommersiya fəaliyyətini və karbohidrogen hasilatını təşviq etmək niyyətindədir.

Argentinanın xarici siyasət idarəsi vurğulayıb ki, Londonun addımları BMT Baş Assambleyasının 31/49 saylı qətnaməsinin açıq-aşkar pozulmasıdır. Bu sənəd suverenliklə bağlı mübahisənin dinc yolla həlli prosesi başa çatana qədər hər iki tərəfi adalardakı vəziyyəti dəyişdirə biləcək birtərəfli qərarlar qəbul etməkdən çəkinməyə çağırır.

Malvin (Folklend) adaları ümumi sahəsi 12 min kvadratkilometrdən bir qədər çox olan iki böyük və 800-ə yaxın kiçik adadan ibarətdir və burada təxminən 3,2 min nəfər yaşayır. Bu ərazilər ətrafında Argentina və Böyük Britaniya arasında ərazi münaqişəsi 200 ilə yaxındır ki, davam edir.

Mənbə: azernews.az

Materialı hazırladı:Qurban Qurbanzadə