BƏƏ rəsmiləri: Flydubai-in ikinci pilotu terror aktı planlaşdırıb, İsrail istintaqda iştirak edir

Birləşmiş Ərəb Əmirliklərinin (BƏƏ) baş prokuroru Hamad Seyf əş-Şamsi bildirib ki, Flydubai təyyarəsində baş verən insidentlə bağlı istintaq ikinci pilotun “terror əməliyyatı” həyata keçirməyə başladığını müəyyən edib.

BƏƏ-nin WAM dövlət agentliyinin məlumatına görə, ikinci pilot uçuş zamanı kabinədə təcili balta ilə təyyarə komandirinə hücum edib və idarəetməni ələ keçirməyə çalışıb.

İstintaqın davam etdiyini bildirən baş prokuror hadisənin motivləri, mümkün əlaqələr, eləcə də texniki ekspertizaların və maddi-rəqəmsal sübutların araşdırıldığını deyib. Yekun nəticələrin bütün prosedurlar başa çatdıqdan sonra açıqlanacağı bildirilib.

172 sərnişin olub

Dubaydan Təl-Əvivə uçan 1073 saylı reysin göyərtəsində 172 sərnişin, o cümlədən 166 israilli, həmçinin ekipaj üzvləri olub.

Məlumata görə, ikinci pilot təyyarənin hindistanlı komandirini yaralayıb. Buna baxmayaraq, komandir kabinənin qapısını açmağa nail olub. Bundan sonra sərnişinlər və ekipaj üzvləri hücum edəni zərərsizləşdiriblər.

Təyyarə Səudiyyə Ərəbistanının Təbuk şəhərinə təcili eniş edib.

İkinci pilot BƏƏ-yə təhvil verilib

Hadisədən sonra ikinci pilot Səudiyyə Ərəbistanında saxlanılıb və daha sonra BƏƏ-yə təhvil verilib. İsrail müstəntiqlərinin də araşdırmada BƏƏ rəsmiləri ilə əməkdaşlıq edəcəyi bildirilir.

Hücum edən şəxsin Hammam əl-Hammami olduğu açıqlanıb. Məlumata görə, o, omanlı ata və suriyalı ananın övladıdır. Onun daha əvvəl Oman aviasiyasında çalışdığı, sonradan Emirates-də işləmək cəhdinin uğursuz olduğu və Flydubai-də fəaliyyətə başladığı bildirilir.

Netanyahu və Trampdan açıqlamalar

İsrailin baş naziri Binyamin Netanyahu ikinci pilotun “islam ekstremizminin təsiri altına düşdüyünü” və təyyarəni sərnişinlərlə birlikdə yerə çırpmaq niyyətində olduğunu bildirib.

ABŞ prezidenti Donald Tramp isə ikinci pilotun hücumda iştirakı təsdiqlənərsə, İrana qarşı sərt addımlar atılacağını deyib. Tramp hadisədə İranın mümkün rolunun araşdırılmalı olduğunu bildirib.

BƏƏ prezidentinin müşaviri Ənvər Qarqaş isə hadisəni “ciddi terror aktı” adlandırıb.

İsraillilər BƏƏ-dən geri qayıdır

Flydubai İsrailə uçuşları müvəqqəti dayandırdıqdan sonra BƏƏ-də qalan israillilərin ölkəyə qaytarılmasına başlanılıb.

İsrailin Arkia aviaşirkətinin ilk reysi şənbə günü səhər Dubaydan Təl-Əvivə çatıb. El Al isə cümə günü planlaşdırılan reyslərini ləğv edib.

İsrail Nəqliyyat Nazirliyi xüsusi reyslərin təşkili üçün BƏƏ-nin təhlükəsizlik qurumları ilə razılaşdırma prosesinin davam etdiyini açıqlayıb.

Mənbə: bbc.com

Materialı hazırladı:Əbdulrəhman Sadıxlı