Flydubai-nin Dubaydan Təl-Əvivə uçan təyyarəsi qaçırılma siqnalı verdi, İsrail qırıcıları havaya qalxdı
Flydubai aviaşirkətinin Dubaydan Təl-Əvivə uçan sərnişin Boeing 737 təyyarəsi mümkün qaçırılma barədə 7500 kodu verdi. Sonradan məlum oldu ki, göyərtədə rus və ukrayna mənşəli pilotlar arasında dava baş verib.
Yulduz Səlimov1 dəq oxunuş
Flydubai-nin Dubaydan Təl-Əvivə uçan reysi əvvəlcə qəza siqnalı, daha sonra isə mümkün qaçırılma zamanı istifadə olunan 7500 kodunu verdi. İsrail qırıcıları havaya qaldırdı, Baş nazir Binyamin Netanyahu təcili müşavirə çağırdı. Sonradan məlum oldu ki, siqnal pilotlar arasında dava ilə bağlı olub.
Eniş zamanı təyyarə əvvəlcə ümumi fövqəladə vəziyyətin beynəlxalq siqnalı olan 7700 kodunu, qısa müddət sonra isə qanunsuz müdaxilə və ya qaçırılma barədə məlumat vermək üçün istifadə olunan 7500 kodunu ötürdü. Həmin vaxt təyyarə əl ilə idarəetmə rejimində enirdi, daha sonra istiqamətini dəyişərək Səudiyyə Ərəbistanına yönəldi. Göyərtədə təxminən 180 nəfər var idi.
Təyyarə ilə əlaqə kəsildi. Təyyarənin Ben-Qurion hava limanına enməsinə icazə verilmədi. Pilotların nə İsraildə, nə də İordaniyada dispetçer xidmətləri ilə əlaqə saxlamadığı dəqiqləşdirildi. Daha sonra ekipaj yenidən qəza siqnalı verdi.
Pilotların davası və Tabukda eniş
Daha sonra göyərtədə pilotlar arasında əlbəyaxa dava baş verdiyi barədə məlumat yayıldı. Davadan sonra ekipaj qəza düyməsini basıb, təyyarə isə Səudiyyə Ərəbistanının Tabuk şəhərində eniş edib. İsrail KİV-inin müəyyənləşdirdiyinə görə, pilotlardan birinin Rusiya, digərinin isə Ukrayna mənşəyi var.
Versiyalardan birinə görə, Dubay–Təl-Əviv reysinin pilotlarından biri təyyarəni 30 min fut yüksəklikdən qəsdən kəskin enişə yönəldib. Bundan sonra ikinci pilot və sərnişinlər ona mane olmağa çalışıblar.
Sərnişin qadının sözlərinə görə, uçuş zamanı insanlar qışqırıq səsləri eşidiblər. Onlar pilot kabinəsinin qapısını açanda orada qan olub, pilotlardan biri isə qatlanan bıçaqla zərbə alıb.
Mənbə: lenta.ru
