Netanyahu həbs olunmaqdan ehtiyat edir: təyyarəsi BMT Baş Assambleyası zamanı Nyu-Yorkda enməyəcək

İsrailin Baş naziri Benyamin Netanyahu BMT Baş Assambleyasında iştirak etmək üçün ABŞ-a yollanacaq, lakin onun təyyarəsinin Nyu-Yorkda enməyəcəyi bildirilir. Təyyarənin qonşu Nyu-Cersi ştatına gələcəyi gözlənilir.

İsrail mediası marşrutun dəyişdirildiyini bildirib. Səfərə hazırlıq çərçivəsində İsrail baş nazirinin ofisinin əməkdaşları və onun şəxsi mühafizəsindən ibarət qrup səfərin təfərrüatlarını razılaşdırmaq üçün əvvəlcədən ABŞ-a gəlib.

ABŞ-dakı mənbələrin məlumatına görə, mühafizə əməkdaşları və ABŞ Məxfi Xidmətinin əməkdaşları Newark hava limanının administrasiyası ilə Netanyahuya məxsus təyyarənin təhlükəsizliyi və səfər zamanı onun dayanacağı yer məsələlərini müzakirə ediblər.

Netanyahunun mümkün həbsi məsələsi Beynəlxalq Cinayət Məhkəməsinin onun həbsi barədə qərarı fonunda gündəmə gəlib. Nyu-York meri Zöhran Məmdani daha əvvəl İsrail baş nazirini şəhərdə görmək istəmədiyini bildirmişdi.

Məmdani bildirmişdi ki, Nyu-York şəhərinin qanunlarının verdiyi səlahiyyətlər çərçivəsində hərəkət edəcək, lakin bu məqsədlə öz qanunlarını yaratmayacaq.

Daha sonra Nyu-York meri bildirib ki, Beynəlxalq Cinayət Məhkəməsinin qərarını müstəqil şəkildə icra etmək səlahiyyəti yoxdur, lakin onun sözlərinə görə, belə tədbirləri ABŞ-ın federal hakimiyyət orqanları həyata keçirə bilər.

Netanyahunun qarşıdakı səfəri ilə əlaqədar Nyu-Yorkda da təhlükəsizlik tədbirləri görülür. Şəhər polisi Birləşmiş Millətlər Təşkilatının binası qarşısında mümkün genişmiqyaslı etiraz aksiyalarına hazırlıq gördüyünü bildirib.

Mənbə: cnnturk.com

Materialı hazırladı:Əbdulrəhman Sadıxlı