Pentaqon ABŞ qoşunlarının Yaxın Şərqdə qalma müddətini uzadır
ABŞ hərbçilərinin Yaxın Şərq regionunda xidmət müddəti artırılır ki, bu da logistik çətinliklər yaradır və silahların texniki xidmətinə mane olur.

ABŞ-ın müdafiə naziri Pit Hegset Amerika hərbçilərinin Yaxın Şərqdə qalma müddətini uzatmaq barədə qərar qəbul edib. Məlumatlara görə, regiondakı əməliyyatların cari ilin sonuna qədər başa çatacağına dair zəmanət yoxdur, bu da komandanlığı rotasiya qrafiklərini yenidən tənzimləməyə məcbur edir.
Hazırda regionda 50 minə yaxın ABŞ hərbçisi yerləşdirilib. Qruplaşmanın tərkibinə ABŞ Hərbi Dəniz Qüvvələrinin 19 gəmisi, qırıcı eskadrilyalar, hava hücumundan müdafiə bölmələri və desant qüvvələri daxildir. HHM qüvvələri üçün döyüş növbətçiliyinin standart müddəti rəsmi olaraq 9 aydan 12 aya qədər artırılıb.
Uzunmüddətli mövcudluq şəxsi heyətin vəziyyətinə və döyüş vahidlərinin texniki xidmətinə mənfi təsir göstərir. Xüsusilə, "Spruance" və "Delbert D. Black" esminesləri əməliyyatların əvvəlindən bəri münaqişə zonasında qalaraq dəniz blokadasında iştirak edirlər. Bu gəmilərin ekipajları aylarla limana daxil olmadan dənizdə qalmağa məcbur olurlar. Həmçinin, 82-ci hava-desant diviziyasının bölmələrinin gələn ilə qədər regionda qala biləcəyi bildirilir.
Logistik problemlər təchizat prosesini və hərbçilərə poçt çatdırılmasını çətinləşdirir. Bundan əlavə, "Theodore Roosevelt" aviadaşıyıcısının yerləşdirilməyə hazırlanması planlaşdırılır, onun döyüş növbətçiliyinin isə gələn ilin yazına qədər uzadıla biləcəyi qeyd olunur.
ABŞ Prezidenti Donald Tramp şəxsi söhbətlərində aktiv hərbi əməliyyatların dayandırılmasının tərəfdarı olduğunu bildirir. Dövlət başçısının mövqeyi ondan ibarətdir ki, Vaşinqtonun məqsədlərinə əsasən Tehrana qarşı iqtisadi təzyiqləri gücləndirməklə nail olmaq olar.
Mənbə: oxu.az





