İlham Əliyev SABAH.city innovasiya şəhərciyinin birinci mərhələsinin açılışında iştirak edib
Sentyabrın 14-də Bakıda Yüksək Texnologiyalar Parkının ərazisində 1500-dən çox tələbənin praktiki təhsili üçün nəzərdə tutulmuş SABAH.city innovasiya şəhərciyinin birinci mərhələsi açılıb.

Azərbaycan Prezidenti İlham Əliyev sentyabrın 14-də Elm və Təhsil Nazirliyinin Bakıdakı Yüksək Texnologiyalar Parkının ərazisində salınmış SABAH.city innovasiya şəhərciyinin birinci mərhələsinin açılış mərasimində iştirak edib. Layihənin birinci növbəsi 5 hektardan çox ərazini əhatə edir və ümumi sahəsi 20 min kvadratmetr olan bir-biri ilə əlaqəli dörd korpusdan ibarət kompleksi birləşdirir.
Kompleksin tikintisinə ötən ilin oktyabrında başlanılıb. Gələcəkdə SABAH.city ərazisinin ümumi sahəsi 20 hektar təşkil edəcək. Birinci mərhələdə təhsil və tədqiqat prosesinə Bakı Dövlət Universiteti, Azərbaycan Texniki Universiteti və Azərbaycan Dövlət Neft və Sənaye Universitetinin 1500-dən çox tələbəsinin cəlb olunması planlaşdırılır. Şəhərcik tam gücü ilə fəaliyyət göstərməyə başladıqdan sonra onun gündəlik davamiyyəti təxminən 3 min nəfər olacaq.
Şəhərcikdə süni intellekt, robototexnika, kompyuter elmləri, kibertəhlükəsizlik, biotexnologiya, nanobiologiya, nanofizika, kimya və telekommunikasiya istiqamətləri üzrə 13 tədris və tədqiqat laboratoriyası yaradılıb. Layihənin birinci növbəsinə ümumilikdə 23 ekosistem iştirakçısı, o cümlədən üç ali təhsil müəssisəsi, 8 texnologiya şirkəti və 12 startap cəlb olunub. Fəaliyyət üçün 22 ofis otağı və kovorkinq zonası qurulub, həmçinin idman meydançaları, dayanacaqlar, piyada və velosiped yolları salınıb.</
Elm və təhsil naziri Emin Əmrullayev və Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin sədri Ülvi Mehdiyev dövlət başçısına şəhərcikdə fəaliyyət göstərən layihələr barədə məlumat veriblər. Bunların arasında ASAN Süni İntellekt Mərkəzi (ASAN AI Hub), INNOLAND İnkubasiya və Akselerasiya Mərkəzi və "Süni İntellekt Assistent" platforması var.
ASAN AI Hub Mərkəzi tədqiqatçıları, dövlət qurumlarını və biznesi vahid rəqəmsal platformada birləşdirir. Hazırda mərkəz tərəfindən süni intellekt sahəsində 50 həll təqdim olunub, Azərbaycanın 8 ali təhsil müəssisəsi, Azərbaycan Milli Elmlər Akademiyası, həmçinin Tsinxua Universiteti, Oksford Universiteti və Boğaziçi Universiteti ilə tərəfdaşlıq əlaqələri qurulub. INNOLAND İnkubasiya Mərkəzindən 150 startap keçib, bunlardan dördü xarici investorlar tərəfindən əldə edilib.
Mənbə: oxu.az





