Antalya 77-ci Beynəlxalq Kosmik Konqresə hazırdır

Antalyada 77-ci Beynəlxalq Kosmik Konqresə (IAC 2026) hazırlıq başa çatıb. Türkiyə bu tədbiri ilk dəfə qəbul edəcək. Hər il Beynəlxalq Kosmik Federasiya tərəfindən keçirilən konqres bu il 5–9 oktyabr tarixlərində Sənaye və Texnologiya Nazirliyinin koordinasiyası ilə keçiriləcək, onun ev sahibləri isə Türkiyə Kosmik Agentliyi və SAHA İstanbul olacaq.

Hər il milyonlarla turist qəbul edən və artıq G20 sammiti, NATO sammiti və Antalya Diplomatiya Forumu kimi beynəlxalq tədbirlərə ev sahibliyi edən Antalya kosmik konqres üçün lazım olan hər şeyi hazırlayıb. Məkan turizm mərkəzi Belekdəki NEST Konqres-Sərgi Mərkəzi olacaq. Mərkəzin ətrafında təhlükəsizlik tədbirləri gücləndirilib, daxili məkanları isə açılış mərasimi, sessiyalar və görüşlər üçün təchiz edilib.

Konqres üçün hazırlanmış vizual materiallarda Antalyanın tarixi və təbii görməli yerlərinin Side və Aspendos antik şəhərlərinin, Kaputaş çimərliyinin və Yivli Minarənin təsvirlərindən istifadə olunub.

Türkiyə Kosmik Agentliyinin rəhbəri Yusuf Kıraç bildirib ki, hazırlıq üç il əvvəl Antalyada 77-ci Beynəlxalq Kosmik Konqresin keçiriləcəyinin elan olunmasından sonra başlayıb. Onun sözlərinə görə, agentliyin nümayəndələri təcrübə öyrənmək üçün Milan və Sidney konqreslərində iştirak ediblər.

«Konqresin keçiriləcəyi zonada gərgin iş gedir. Konqresdə beynəlxalq kosmik sənaye şirkətləri iştirak edəcək. SpaceX, Airbus, Boeing, həmçinin Uzaq Şərqdən, Çindən və Avropadan bir çox şirkət burada olacaq. Bu şirkətlər öz texniki məhsullarını təqdim edəcəklər».

108 ölkə və müraciətlər üzrə dünya rekordu

Kıraç qeyd edib ki, konqresdə akademiklər öz elmi məqalələri ilə iştirak edəcəklər.

«Türkiyədə ilk dəfə keçirilən bu tədbirdə rekord qeydə alınıb. 108 ölkədən elmi məqalələrlə minlərlə müraciət daxil olub. Türkiyə gənclərinin marağı xüsusilə sevindiricidir. Türkiyədən konqresə 1800-dən çox məqalə gəlib. Bu, dünya rekordudur — 77 il ərzində bir ölkədən ən çox məqalə sayı. Onlardan təxminən 700-ü qəbul edilib. Gənclərimiz gələcək və öz məqalələrini təqdim edəcəklər».

İlk dəfə — Future Space zonası

Agentlik rəhbərinin sözlərinə görə, Antalyada bağlanacaq ikitərəfli əlaqələr və müqavilələr sayəsində təşkilatçılar ideyaların məhsula çevrilməsinə kömək etmək istəyirlər.

«Konqres tarixində ilk dəfə burada Future Space zonası yaradılacaq. Orada nazirliyin müəyyən müsabiqələrində ilk 10-luğa daxil olan startaplar, həmçinin TEKNOFEST qalibləri iştirak edəcəklər. Xarici startaplar da bu zonada olacaq».

Mənbə: milliyet.com.tr

Materialı hazırladı:Əbdulrəhman Sadıxlı