Bakıda 10-cu DokuBaku Beynəlxalq Sənədli Film Festivalı keçirilir

Artıq bir neçə gündür ki, Bakıda 10-cu DokuBaku Beynəlxalq Sənədli Film Festivalı keçirilir. Festival 11 oktyabr tarixinə qədər davam edəcək.

Festival Azərbaycan Respublikasının Mədəniyyət Nazirliyinin tabeliyində fəaliyyət göstərən Kino Agentliyinin dəstəyi və Nizami Kino Mərkəzinin tərəfdaşlığı ilə təşkil olunub.

Bu il “Ulduz sivilizasiyası” (Stellar Civilization) mövzusu ətrafında keçirilən festival sənədli kino həvəskarlarını bir araya gətirib. Tədbir çərçivəsində tamaşaçılara fərqli mövzuları, insan hekayələrini və dünyaya müxtəlif baxışları əks etdirən sənədli filmlər təqdim olunub.

Sənədli kino sahəsində mühüm platformalardan biri olan DokuBaku Beynəlxalq Sənədli Film Festivalı tamaşaçıların dünya kinosunun müxtəlif nümunələri ilə tanış olması, yeni yaradıcı yanaşmaların və aktual mövzuların müzakirəsi baxımından əhəmiyyət daşıyır.

Festival çərçivəsində nümayiş olunacaq filmləri izləmək ödənişsizdir. Kino həvəskarları sənədli filmlərin təqdim etdiyi fərqli hekayələri kəşf etmək və festivalın proqramında iştirak etmək imkanı əldə ediblər.