Şəkidə V Beynəlxalq Teatr Festivalında İran kollektivi çıxış edib
V Şəki Beynəlxalq Teatr Festivalının dördüncü günündə İranın Ərdəbil Moqan Honar Teatrı "İçimdə bir Araz addımlayır" tamaşasını təqdim edib.
Qurban Qurbanzadə1 dəq oxunuş
V Şəki Beynəlxalq Teatr Festivalının dördüncü günündə İran İslam Respublikasının Ərdəbil Moqan Honar Teatrı "İçimdə bir Araz addımlayır" tamaşasını təqdim edib. Tamaşa festival iştirakçıları və teatrsevərlər tərəfindən böyük maraq və alqışlarla qarşılanıb.
Əsərin müəllifi Arif Məhtabdır, tamaşaya Qərib Mənuçehri quruluş verib. Səhnə əsərində gənc qadının həsrəti və gözləntisi, gənc kişinin vətəninə qayıtmaq üçün illərlə çəkdiyi əziyyət və onların bir-birinə qovuşa bilməməsi təsvir olunur.
Rolları Davər Fərmani və Nəstəran Əkbərzadə canlandırıblar. Tamaşanın musiqi və vokal həllini Yaşar Haşimi hazırlayıb.
Festival simvolu və təşəkkürnamə
Nümayişdən sonra festivalın simvolu Mədəniyyət Nazirliyinin İncəsənət siyasəti şöbəsinin İfa sənətləri sektorunun müdiri Böyükxanım Talıbova tərəfindən Ərdəbil Moqan Honar Teatrının rəhbərliyinə təqdim olunub. Şəki Şəhər İcra Hakimiyyəti tərəfindən kollektivə Təşəkkürnamə və xatirə hədiyyəsi verilib.
Həmçinin festivalın bədii rəhbəri, Əməkdar incəsənət xadimi Mirbala Səlimliyə tamaşanın quruluşçu rejissoru Qərib Mənuçehri tərəfindən xatirə hədiyyəsi təqdim edilib.
Beləliklə, festivalın növbəti günü maraqlı səhnə əsəri və Azərbaycan-İran arasında mədəni mübadilə ilə yadda qalıb.
