Bakıda “Yaşıl enerji dəhlizi” layihəsinə həsr olunmuş ilk beynəlxalq forum keçirilir

Bakıda "Xəzər–Qara dəniz–Avropa Yaşıl enerji dəhlizi" layihəsinə həsr olunmuş ilk beynəlxalq forum keçirilir. Onun mövzusu — "Yaşıl enerji dəhlizi: texniki-iqtisadi əsaslandırmadan həyata keçirilməyə"dir. Forum layihənin investisiya və tərəfdaşlıq imkanlarına həsr olunub.

Azərbaycan Energetika Nazirliyinin APA-Economics agentliyinə verdiyi məlumata görə, forumun məqsədi layihənin texniki-iqtisadi əsaslandırma mərhələsindən investisiya və praktik həyata keçirilmə mərhələsinə keçidini sürətləndirməkdir. Forumda potensial tərəfdaşlarla biznes-model, maliyyələşdirmə strukturu və kommersiya perspektivləri müzakirə olunacaq. Forum, həmçinin 2029-cu ildə planlaşdırılan yekun investisiya qərarına hazırlığa töhfə verməlidir.

Tədbirdə Azərbaycan və tərəfdaş ölkələrin dövlət orqanlarının, Avropa Birliyinin, beynəlxalq maliyyə institutlarının, investisiya fondlarının, enerji şirkətlərinin, ötürücü sistem operatorlarının, kabel istehsalçılarının, texnoloji təchizatçıların, mühəndislik və sığorta şirkətlərinin nümayəndələri iştirak edir. Iştirakçılar arasında Avropa Yenidənqurma və İnkişaf Bankı (EBRD), Avropa İnvestisiya Bankı (EIB), Asiya İnkişaf Bankı (ADB), Qara dəniz Ticarət və İnkişaf Bankı, İslam İnkişaf Bankı, habelə SOCAR Green, ACWA Power, Siemens Energy, ABB və TotalEnergies kimi bir sıra beynəlxalq şirkətlər var.

Forumun açılışında çıxış edən Energetika naziri Pərviz Şahbazov layihənin regional enerji təhlükəsizliyi, təchizatın şaxələndirilməsi və yaşıl keçid baxımından strateji əhəmiyyətini vurğulayıb. Onun sözlərinə görə, cari ilin iyul ayında başa çatmış layihənin tədqiqatı layihənin texniki cəhətdən həyata keçirilə biləcəyini və iqtisadi baxımdan cəlbedici olduğunu təsdiqləyib. Layihə 2022-ci ildə Buxarestdə Azərbaycan, Gürcüstan, Rumıniya və Macarıstanın strateji tərəfdaşlıq haqqında saziş imzaladığı zaman təsis edilib.

Texniki-iqtisadi əsaslandırmaya görə, "Yaşıl enerji dəhlizi"nin uzunluğu təxminən 3 min kilometr olacaq. Ekspluatasiyaya mərhələli buraxılış 2032-ci ildən planlaşdırılır, ötürmə gücü isə 4 QVt təşkil edəcək. Qiymətləndirmələrə görə, layihə regionda bərpa olunan enerjinin istehsalını ən azı 8 QVt həcmində inkişaf etdirməyə imkan verəcək, 2040-cı ildən isə Avropaya ildə təxminən 20 milyard kVt·saat elektrik enerjisi ötürmək və karbon qazı emissiyalarını 3,6 milyon tona qədər azaltmaq mümkün olacaq.

Nazir, həmçinin tənzimlənən və kommersiya komponentlərini birləşdirən hibrid biznes-modelin nəzərdən keçirildiyini bildirib. Model elektrik enerjisinin uzunmüddətli alqı-satqı müqavilələrinə, özəl kapitalın cəlb olunmasına və enerjinin transsərhəd ticarətinin inkişafına əsaslanır.

"Məqsədimiz "Yaşıl enerji dəhlizi"ni aydın biznes-modeli, dayanıqlı maliyyə strukturu və investorlar üçün cəlbedici şərtləri olan regional infrastruktur layihəsinə çevirməkdir", — deyə Pərviz Şahbazov bildirib.

Şahbazovun sözlərinə görə, beynəlxalq maliyyə institutlarının və özəl investorların iştirakı, etibarlı biznes-model və uzunmüddətli kommersiya razılaşmaları son investisiya qərarının hazırlanması üçün əsas şərtlərdir.

Mənbə: apa.az

Materialı hazırladı:Qurban Qurbanzadə