Azərbaycan güləşçiləri Bakıda keçirilən U-17 çimərlik güləşi üzrə dünya çempionatında səkkiz medal qazanıblar
Bakıda 17 yaşadək yeniyetmələr arasında çimərlik güləşi üzrə dünya çempionatı başa çatıb. Azərbaycan idmançıları ölkənin aktivinə iki qızıl, üç gümüş və üç bürünc medal yazdırıblar.

Bakıda 17 yaşadək yeniyetmələr arasında çimərlik güləşi üzrə dünya çempionatına yekun vurulub. Azərbaycan təmsilçiləri doğma meydanda keçirilən turniri ümumilikdə səkkiz medalla başa vurublar.
Oğlanların yarışında Elcan Həsənov (60 kq) və Nihat Süleymanlı (80 kq) qızıl medal qazanıblar. Əlirza Heybətli (60 kq) və Elgün Kərimli (90 kq) gümüş, Tunar Quliyev (70 kq) və Ruslan Vəliyev (80 kq) isə bürünc medala sahib çıxıblar.
Qızların yarışında Rəna Nuriyeva (65 kq) fəxri kürsünün ikinci pilləsinə yüksələrək gümüş medal qazanıb. Simura Abdullayeva (75 kq) isə bürünc medalın sahibi olub.
Komanda hesabında qızlar arasında Azərbaycan yığması birinci yeri tutub. İkinci yeri ABŞ, üçüncü yeri isə Yaponiya komandası tutub. Oğlanların komanda hesabında İran qalib gəlib, Azərbaycan güləşçiləri ikinci pillədə qərarlaşıb, ilk üçlüyü Seneqal yığması tamamlayıb.
Mənbə: report.az





