Azərbaycan və Türkiyə Beşinci Enerji Forumunun protokolunu imzalayıblar
Azərbaycan və Türkiyə arasında enerji əməkdaşlığı hər iki ölkənin regional və qlobal bazarlardakı mövqelərini möhkəmləndirir, deyə Türkiyə naziri Alparslan Bayraktar bildirib.
Əbdulrəhman Sadıxlı1 dəq oxunuş
Türkiyə və Azərbaycan arasında enerji əməkdaşlığı regional və qlobal bazarlara çıxışın təmin edilməsində həlledici rol oynayır. Bu barədə Türkiyənin energetika və təbii sərvətlər naziri Alparslan Bayraktar Bakıda keçirilən Beşinci Azərbaycan-Türkiyə Enerji Forumunda bəyan edib.
Qurum rəhbərinin sözlərinə görə, iki dövlət arasındakı münasibətlər adi qonşuluq və ya ticarət tərəfdaşlığı çərçivəsindən kənara çıxan unikal xarakter daşıyır.
“Bu münasibətlər sarsılmaz qardaşlığa, qarşılıqlı etimada və tarix boyu əldə etdiyimiz nailiyyətlərə söykənir. Buna görə də biz bu forumu sadəcə iki ölkənin enerji sektorlarının görüşü kimi görmürük. Bu, əslində "Bir millət, iki dövlət" şüarı altında ortaq gələcəyimizi gördüyümüz və bu baxışı konkret layihələrə çevirdiyimiz strateji platformadır”, — deyə Bayraktar qeyd edib.
Nazir vurğulayıb ki, enerji sahəsi ikitərəfli qarşılıqlı əlaqələrin ən mühüm istiqamətlərindən biridir. Həyata keçirilən birgə layihələr təbii qazı, karbohidrogenləri, həmçinin Azərbaycanın enerji resurslarının Türkiyə ərazisindən beynəlxalq bazarlara çatdırıldığı boru kəmərlərini əhatə edir.
“Bu layihələr enerji resurslarının bir ölkədən digərinə nəqlindən daha böyük əhəmiyyət kəsb edir; onlar ölkələrimizin bir-birinə bəslədiyi etimadın, uzunmüddətli baxışımızın və birgə fəaliyyət göstərmək əzmimizin konkret nümunələridir”, — deyə o əlavə edib.
Bununla yanaşı, iki ölkənin qurumları arasında əməkdaşlıq dağ-mədən sənayesi və bərpa olunan enerji mənbələrindən tutmuş enerji səmərəliliyi, elektrik enerjisi bazarları, eləcə də elektrik enerjisinin ötürülməsi və paylanmasına qədər geniş sahələri əhatə edir.
Mənbə: report.az
