Azərbaycanlı jurnalistlər İsrail və Livan sərhədini ziyarət ediblər
Bir qrup azərbaycanlı jurnalist İsrailin şimal sərhədində olub və Livanla həmsərhəd rayonlardakı cari vəziyyətlə tanış olub.

Bir qrup azərbaycanlı jurnalist İsrailin şimal sərhədinə səfər edərək Livanla həmsərhəd rayonlardakı cari vəziyyətlə, həmçinin bu regionda "Hizbullah" qruplaşmasının mövcudluğu ilə bağlı əsas çağırışlarla tanış olub.
Səfər çərçivəsində "Alma" Tədqiqat və Təhsil Mərkəzinin təsisçisi və prezidenti Sarit Zehavi KİV nümayəndələri üçün brifinq keçirərək sərhəd boyu vəziyyət barədə məlumat verib.
"Suriya və Livandakı siyasi vəziyyətin dəyişməsi "Hizbullah"ı zəiflətdi. Prinsipcə, İsrail və Livan hökuməti qruplaşmanın tərksilah edilməsində ortaq marağı bölüşürlər. Buna görə də biz müsbət nəticəyə ümid edirik", — deyə o bildirib.
Xatırladaq ki, 2023-cü ilin oktyabrında İsrail və HƏMAS arasında müharibə başladıqdan sonra İsrail və Livan sərhədində İsrail Müdafiə Qüvvələri (ÇAXAL) ilə "Hizbullah" arasında müntəzəm atışmalar başlayıb. 2023-cü il oktyabrın 8-də hərəkat mübahisəli Şeba fermaları rayonunda İsrail mövqelərinin atəşə tutulmasına görə məsuliyyəti üzərinə götürüb, bundan sonra İsrail zərbələrlə cavab verib. O vaxtdan bəri sərhəddə gərginlik dövri olaraq kəskinləşir.
Mənbə: report.az





