Prezident İlham Əliyev MDB ölkələrinin kulinariya festivalında olub və rəsmi qəbulda iştirak edib

Azərbaycan Respublikasının Prezidenti İlham Əliyev Türkmənbaşı şəhərində keçirilən MDB ölkələrinin Milli Kulinariya Festivalı ilə tanış olub.

Festival Türkmənistanın 2026-cı ildə MDB-də sədrliyi çərçivəsində təşkil olunan tədbirlər çərçivəsində keçirilir. Festivalda səkkiz ölkə təmsil olunur.

Azərbaycan milli pavilyonu Mədəniyyət Nazirliyi və Azərbaycan Dövlət Turizm Agentliyinin birgə təşkilatçılığı ilə yaradılıb və iki hissədən ibarətdir. Kulinariya hissəsində milli mətbəx və qastronomik ənənələr, həmçinin ölkənin müxtəlif regionları üçün xarakterik olan yerli bitkilər, meyvələr, dənli bitkilər, qoz-fındıq və digər məhsullar təqdim edilir. Ziyarətçilərə həmçinin UNESCO-nun Qeyri-Maddi Mədəni İrs Siyahısına daxil edilmiş Azərbaycan çay mədəniyyəti nümayiş etdirilir.

Pavilyonun ikinci hissəsində xalçaçılıq, kəlağayı, misgərlik, ağac üzərində oyma və keramika təqdim olunur. Burada da Azərbaycan Milli Xalça Muzeyinin ekspozisiyası əsasında XIX əsr Qarabağ evinin interyeri bərpa edilib.

Pavilyonda həmçinin Azərbaycan musiqisi, o cümlədən gənc xanəndələrin ifasında muğam səslənib.

Rəsmi qəbul

Həmin gün Türkmənbaşında Türkmənistan Prezidenti Sərdar Berdiməhəmmədovun adından rəsmi qəbul verilib və konsert proqramı təşkil olunub. Tədbirdə Prezident İlham Əliyev iştirak edib.

Mənbə: modern.az

Materialı hazırladı:Qurban Qurbanzadə