Maltepedə bina uçub: iki mərtəbə qanunsuz olub, mer 5 mərtəbəyə icazə olduğunu bildirib

8 oktyabr 2026-cı il tarixində saat 06:00 radələrində İstanbulun Maltepe rayonunda, Cevizli məhəlləsində 7 mərtəbəli yaşayış binasında uçqun baş verib. Dağıntılar altında yeddi nəfər qalıb, altısını xilas etmək mümkün olub. Maltepe meri Esin Köymenin sözlərinə görə, binanın iki üst mərtəbəsi qanunsuz olub.

Binada 12 mənzil olub, uçota əsasən orada 33 nəfər yaşayırdı. Uçqunun səbəbinin keçiriləcək araşdırmalardan sonra müəyyənləşdiriləcəyi gözlənilir.

Birbaşa yayımlardan birində çıxış edən Köymen bildirib ki, bina 1980-ci illərdə tikilib və arxivdən götürülmüş layihə iki qanunsuz mərtəbənin olduğunu göstərib.

«Məsələ binanın istismar icazəsinə görə neçə mərtəbəsi olduğundadır. Bina 80-ci illərdə tikilib və biz onun layihəsini arxivdən götürdükdə gördük ki, binanın üstündə iki qanunsuz mərtəbə var. İstismar icazəsində (iskan) 5 mərtəbə görünür, iki mərtəbə qanunsuz tikilib. Biz arxivdə sənədləri yoxladıq və gördük ki, binada belə bir vəziyyət olub».

Köymen hadisələrin necə inkişaf etdiyini də danışıb. Onun sözlərinə görə, saat 06:30 radələrində binanın çökməsi və əyilməsi barədə məlumat daxil olub. Hadisə yerinə gəldikdə görüb ki, bina zirzəmiyə, birinci mərtəbəyə çöküb və arxaya əyilib.

Mer qeyd edib ki, əvvəllər bu bina ilə bağlı şikayət daxil olmayıb.

«Biz bütün arxivimizin açılmasını əmr etdik, konstruksiyanın riskli olub-olmaması, bununla bağlı hər hansı prosedurun keçirilib-keçirilməməsi barədə bizə müraciətlərin daxil olub-olmadığını yoxladıq. Bizə heç bir şikayət daxil olmayıb».

Mənbə: milliyet.com.tr

Materialı hazırladı:Qurban Qurbanzadə