Narın tərkibindəki birləşmə ürək çatışmazlığının müalicəsində ümid yaradır

Alimlər nar istehlakından sonra bağırsaq bakteriyaları tərəfindən əmələ gətirilə bilən urolitin A adlı birləşmənin ürək çatışmazlığı olan siçovullarda ürək fəaliyyətini əhəmiyyətli dərəcədə yaxşılaşdırdığını müəyyən ediblər.
London Kinqs Kollecinin alimlərinin apardığı araşdırmaya əsasən, urolitin A ürəyin döyüntülər arasında rahatlamasında mühüm rol oynayan zülalı aktivləşdirə bilər. Tədqiqat Britaniya Ürək Fondunun dəstəyi ilə Science Advances jurnalında dərc olunub.
Araşdırmada “atım fraksiyası qorunmuş ürək çatışmazlığı” (HFpEF) kimi tanınan vəziyyətə diqqət yetirilib. Bu zaman ürək qanı nisbətən normal şəkildə pompalasa da, sərtləşdiyi üçün döyüntülər arasında kifayət qədər rahatlaşa və qanla dolmaya bilir.
Tədqiqat zamanı urolitin A verilən siçovullarda ürək toxumalarının sərtliyinin azaldığı, ürəyin daha yaxşı rahatladığı və daxili təzyiqin aşağı düşdüyü müşahidə olunub. Universitetin məlumatına görə, ürək fəaliyyətinin əsas göstəricilərində yaxşılaşma nəzarət qrupu ilə müqayisədə 80 faizə qədər olub.
Birləşmənin laboratoriyada kök hüceyrələrdən yaradılmış insan ürək toxumasına da müsbət təsir göstərdiyi müəyyənləşib. Alimlər bunun ürəyin yığılması və rahatlamasında, eləcə də arterial təzyiqin tənzimlənməsində iştirak edən PKGIα zülalının aktivləşməsi ilə əlaqəli ola biləcəyini bildirirlər.

Mənbə: skynewsarabia.com