Yeqor Kornev Bakıda dünya rekordunu təkrarladı – Dünya Kubokunun ikinci günündə tarixi nəticə
Bakıda keçirilən üzgüçülük üzrə Dünya Kubokunda artıq yarışın ikinci günündə dünya səviyyəli nəticə qeydə alınıb.
Qurban Qurbanzadə1 dəq oxunuş
Bakıda keçirilən üzgüçülük üzrə Dünya Kubokunda artıq yarışın ikinci günündə dünya səviyyəli nəticə qeydə alınıb.
Oktyabrın 1-də təntənəli açılışı keçirilən və 44 ölkədən 216 idmançının iştirak etdiyi Dünya Kubokunun ikinci yarış günündə rusiyalı üzgüçü Yeqor Kornev 100 metr məsafəyə sərbəst üsulla üzmə yarışında qalib gəlib.
Kornev məsafəni 44,84 saniyəyə qət edib. Bu nəticə dünya rekordunun təkrarlanması deməkdir. Belə ki, eyni nəticəni 2021-ci ildə avstraliyalı Kayl Çalmers Kazanda keçirilən Dünya Kubokunda göstərmişdi.
Beləliklə, Bakıda keçirilən Dünya Kuboku artıq ikinci günündə tarixi nəticəyə şahidlik edib. Yeqor Kornev həm yarışın qalibi olub, həm də 100 metr sərbəst üsulda dünya rekordunu təkrarlayaraq turnirin ən diqqətçəkən nəticələrindən birinə imza atıb.
Qeyd edək ki, Kornev bundan əvvəl Bakıda 50 metr arxası üstə üzmə yarışında qızıl, 50 metr sərbəst üsulda isə gümüş medal qazanıb.
Bakıda keçirilən “İpək Yolu” Dünya Kuboku 3 oktyabradək davam edəcək.
