Bakıda iki metro stansiyasında giriş haqqı ödənişi ləğv edilir
23 sentyabr 2026-cı il tarixindən etibarən Bakı metrosunun "Xocəsən" və "Avtovağzal" stansiyalarına giriş müvəqqəti olaraq pulsuz olacaq. Tədbir metro xətlərinin ayrılması layihəsi çərçivəsində nəqliyyat əlaqəsinin yaxşılaşdırılması məqsədilə həyata keçirilir.
Yulduz Səlimov1 dəq oxunuş
23 sentyabr 2026-cı il tarixindən etibarən Bakı metrosunun "Xocəsən" və "Avtovağzal" stansiyalarına giriş müvəqqəti olaraq pulsuz olacaq. Bu barədə "Bakı Metropoliteni" QSC və Azərbaycan Yerüstü Nəqliyyat Agentliyi məlumat yayıb.
Qərar metro xətlərinin ayrılması layihəsi çərçivəsində qəbul edilib. Məqsəd sərnişinlərin hərəkəti üçün əlavə imkanlar yaratmaq və nəqliyyat axınlarını daha səmərəli təşkil etməkdir.
Yenilik Sumqayıt, Xırdalan, Bakı-Şamaxı yolu üzərindəki yaşayış məntəqələri, həmçinin Abşeron və Qaradağ rayonlarının bir sıra ərazilərinin sakinləri üçün metrodan istifadəni asanlaşdıracaq. Sərnişinlər "Şamaxınka" və "20 Yanvar" ərazilərindən yan keçərək metroya daxil ola biləcəklər.
"Xocəsən" və "Avtovağzal" stansiyaları vasitəsilə daxil olan sərnişinlər pulsuz olaraq doqquz stansiyaya gedə biləcəklər: "8 Noyabr", "Dərnəgül", "Azadlıq prospekti", "Nəsimi", "Memar Əcəmi", "20 Yanvar", "İnşaatçılar", "Elmlər Akademiyası" və "Nizami".
Mərkəzləşdirilmiş nəqliyyat idarəçiliyi çərçivəsində bir sıra avtobus marşrutlarının birbaşa "Xocəsən" və "Avtovağzal" stansiyalarına yönəldilməsi planlaşdırılır. Qərar monitorinqlərə və sosial-iqtisadi təhlilə əsaslanır.
Qəbul edilmiş tədbirlər metronun Yaşıl və Bənövşəyi xətləri ilə Qırmızı xətt arasında daha rahat və alternativ əlaqə təmin etmək, sərnişinlərin vaxt və pul itkisini azaltmaq, həmçinin şəhərə daxilolmalarda ictimai nəqliyyatın hərəkətini optimallaşdırmaq məqsədi daşıyır.
Mənbə: news.milli.az
