Donald Trampın keçmiş teleprompter operatoru insayder ticarətinə görə cərimələnib

ABŞ Əmtəə Fyuçersləri Ticarət Komissiyası (CFTC) prezident Donald Trampın keçmiş teleprompter operatoru Qabriel Peresi insayder ticarətinə görə 172 min dollar ödəməyə məcbur edib. Tənzimləyici müəyyən edib ki, əməkdaş prezidentin çıxışlarının məzmunu haqqında ictimaiyyətə açıqlanmayan məlumatlara çıxışından istifadə edərək Kalshi proqnoz platformasında sövdələşmələr aparıb.

İşin materiallarına görə, Peres dəyəri dövlət başçısının nitqlərində konkret söz və ya ifadələrin istifadəsindən asılı olan müqavilələr bağlayıb. 2016-cı ildən bəri tutduğu vəzifə sayəsində Peres çıxış mətnləri haqqında ilkin məlumatlara sahib olub. Bu əməliyyatlar nəticəsində o, 107 539,02 dollar məbləğində mənfəət əldə edib.

CFTC-nin qərarına əsasən, Peres əldə etdiyi mənfəəti geri qaytarmalı və əlavə olaraq 65 min dollar məbləğində mülki cərimə ödəməlidir. Bundan əlavə, ona üç il müddətinə proqnoz bazarlarında ticarət etmək qadağan edilib. Qurum qeyd edib ki, qayda pozan şəxs istintaq zamanı «nümunəvi şəkildə əməkdaşlıq» edib.

Pozuntu Kalshi platformasının daxili monitorinq sistemi tərəfindən aşkar edilib. Şirkətin baş hüquqşünası Bobbi Deno bildirib ki, birja federal qanunvericiliyi və ya meydança qaydalarını pozan hər kəs üçün cəzanın qaçılmazlığı prinsipinə sadiqdir. Şirkət işin araşdırılmasında CFTC-yə yardım göstərib.

İyul ayında, sövdələşmələr haqqında məlumat ictimailəşdikdən sonra Qabriel Peres inzibati məzuniyyətə göndərilib. Ağ Evin keçmiş mətbuat katibi Karolin Levitt əməkdaşın hərəkətlərini etik normaların pozulması kimi qiymətləndirib və onun artıq prezident administrasiyasında işləməyəcəyini təsdiqləyib.

Mənbə: news.am

Materialı hazırladı:Tünzalə Məlikova