Gəncədə “REGİONAL EXPO GƏNCƏ 2026” sahibkarlıq sərgisi keçiriləcək
Gəncə İdman Sarayında təşkil olunacaq sərgidə 100-dən çox müəssisənin iştirakı və 10 mindən çox ziyarətçinin qatılması planlaşdırılır.
Tünzalə Məlikova1 dəq oxunuş
20-21 noyabr 2026-cı il tarixlərində Gəncə İdman Sarayında “REGİONAL EXPO GƏNCƏ 2026” Sahibkarların Təqdimat Sərgisi baş tutacaq. Tədbir Qərb regionunun dövlət və özəl müəssisələrini, eləcə də sahibkarları vahid platformada bir araya gətirəcək.
Sərgi Gəncə Şəhər İcra Hakimiyyətinin dəstəyi ilə TECHERA, “Gəncə İş Adamları” İctimai Birliyi və GBARU tərəfindən təşkil olunur. Azərbaycan Dövlət Aqrar Universiteti isə tədbirin rəsmi tərəfdaşı qismində çıxış edir.
İki gün davam edəcək sərgidə 100-dən çox müəssisənin öz məhsul və xidmətlərini təqdim etməsi, 10.000-dən artıq ziyarətçinin isə tədbirə qatılması gözlənilir. Sərgi çərçivəsində B2B (biznesdən biznesə), B2G (biznesdən dövlətə) və B2U (biznesdən universitetə) formatında görüşlər keçiriləcək.
Tədbirin əsas məqsədi Bakı ilə regionlar arasında biznes əlaqələrini gücləndirmək, Qərb regionunun iqtisadi potensialını geniş auditoriyaya çatdırmaqdır. İştirakçılar investisiya imkanlarını müzakirə etmək, yeni bazarlara çıxış və ixrac potensialını araşdırmaq imkanı əldə edəcəklər.
Sərgidə stendlə iştirak etmək istəyənlər +994 10 437 55 65 nömrəsi, sponsorluq imkanları ilə maraqlananlar isə +994 70 740 88 40 nömrəsi vasitəsilə əlaqə saxlaya bilərlər. Əlavə məlumat üçün info@techera.az elektron poçt ünvanına müraciət etmək mümkündür.
