İlham Əliyev Si Cinpini Çin Xalq Respublikasının Milli Günü münasibətilə təbrik edib

Azərbaycan Prezidenti İlham Əliyev Çin Xalq Respublikasının sədri Si Cinpinə 1 oktyabr — Çin Xalq Respublikasının Milli Günü münasibətilə təbrik məktubu göndərib.

Müraciətdə Azərbaycan dövlətinin başçısı Çinin nailiyyətlərini qeyd edib və ikitərəfli münasibətlərin əhəmiyyətini vurğulayaraq Çini dost ölkə və Azərbaycanın etibarlı strateji tərəfdaşı adlandırıb.

“Hörmətli cənab Sədr, 1 oktyabr — Çin Xalq Respublikasının Milli Günü münasibətilə öz adımdan və Azərbaycan xalqının adından Sizi və Sizin simanızda dost Çin xalqını ürəkdən təbrik edir, ən xoş arzularımı çatdırıram”.

“Çin Xalq Respublikasının milli rifah, sosial-iqtisadi və elmi-texniki tərəqqi, innovativ inkişaf və digər aparıcı sahələrdə əldə etdiyi tarixi nailiyyətlər və uğurlar Sizin qətiyyətli rəhbərliyiniz və həyata keçirdiyiniz uzaqgörən strateji kurs sayəsində böyük hörmət doğurur. Bu gün Çin dünyanın ən qüdrətli dövlətləri arasında layiqli yer tutur və mühüm, nüfuzlu güc mərkəzi statusu əldə edib”.

Əliyev iki ölkə arasında siyasi dialoqun və qarşılıqlı etimadın yüksək səviyyəsini, həmçinin onların bir-birinin suverenliyini və ərazi bütövlüyünü ardıcıl şəkildə dəstəkləməsini vurğulayıb. Onun sözlərinə görə, dövlətlərarası əlaqələrin yeni tarixi mərhələyə — hərtərəfli strateji tərəfdaşlıq səviyyəsinə çıxması tərəflərin siyasi iradəsinin və birgə səylərinin praktiki ifadəsidir.

İqtisadiyyat və energetika sahəsində əməkdaşlıq

Məktubda ticarət-iqtisadi, nəqliyyat-logistika, investisiya, energetika, kənd təsərrüfatı və humanitar sahələrdə əməkdaşlığın dinamik inkişaf etdiyi qeyd olunub. Həmçinin iki ölkə arasında artıq bir ildir qüvvədə olan vizasız rejim ayrıca qeyd edilib və onun insanlar arasında əlaqələrin və turizmin inkişafına təkan verdiyi bildirilib.

Qlobal əməkdaşlıq amilləri arasında təşəbbüskarı Si Cinpin olan və Azərbaycanın daim dəstəklədiyi “Bir kəmər, bir yol” layihəsi, həmçinin Mərkəzi Asiya ölkələri ilə birgə həyata keçirilən Orta Dəhliz və digər bağlantı layihələri qeyd olunub.

Energetikaya toxunan Əliyev Azərbaycanın bərpa olunan enerji sahəsində Çinin aparıcı şirkəti “Universal Energy”nin fəaliyyətini qeyd edib və şirkət tərəfindən tikilmiş “Qobustan” günəş elektrik stansiyasının açılışını Azərbaycan-Çin iqtisadi əlaqələrinin şaxələndirilməsinin növbəti nümunəsi adlandırıb.

“Əminəm ki, qədim tarixə və xoş ənənələrə malik Azərbaycan-Çin dostluq münasibətləri və hərtərəfli strateji tərəfdaşlıq bundan sonra da yüksələn xətlə inkişaf edəcək və xalqlarımızın iradəsinə uyğun olaraq birgə səylərimizlə möhkəmlənəcək”.

Məktubun sonunda Azərbaycan Prezidenti Si Cinpinə möhkəm cansağlığı, xoşbəxtlik və dövlət fəaliyyətində uğurlar, dost Çin xalqına isə rifah və firavanlıq arzulayıb.

Mənbə: oxu.az

Materialı hazırladı:Əbdulrəhman Sadıxlı