Lənkəran Dövlət Dram Teatrı 136-cı mövsümünə başlayıb
Lənkəran Dövlət Dram Teatrı 136-cı mövsümün açılışını edib. Yeni mövsümdə repertuarın zənginləşdirilməsi və tamaşaçı auditoriyasının genişləndirilməsi əsas prioritet kimi müəyyənləşdirilib.
Tünzalə Məlikova1 dəq oxunuş
Lənkəran Dövlət Dram Teatrı 136-cı mövsümünə start verib. Mövsümün açılışı münasibətilə keçirilən yığıncaqda teatrın qarşısında duran vəzifələr, gələcək planlar və yeni yaradıcılıq dövründə görüləcək işlər müzakirə olunub.
Tədbirdə çıxış edən teatrın direktoru, Azərbaycan Respublikasının Əməkdar mədəniyyət işçisi və Dağıstan Respublikasının Əməkdar artisti Laləzar Hüseynova kollektivi təbrik edərək, ötən mövsümdə görülən işləri yüksək qiymətləndirib. O, kollektivin zəhmətini təqdirəlayiq adlandırıb.
Laləzar Hüseynova bildirib ki, yeni mövsüm daha böyük hədəflərlə müşayiət olunur. Direktorun sözlərinə görə, repertuarın zənginləşdirilməsi, tamaşaların bədii səviyyəsinin yüksəldilməsi və tamaşaçı sayının artırılması qarşıda duran əsas məqsədlərdir.
Yığıncaq çərçivəsində ötən mövsümün yekunlarına nəzər salınıb, nümayiş olunan tamaşalar, keçirilən tədbirlər və hazırlanan səhnə proqramları xatırladılıb. Şöbə müdirləri isə yeni mövsüm üçün nəzərdə tutulan planlarını kollektivlə bölüşüblər.
İclasda vurğulanıb ki, hər bir əməkdaşın öz işinə məsuliyyətlə yanaşması yeni mövsümün uğurlu olması üçün ən vacib şərtdir. Teatrın 136-cı mövsümü Hüseynbala Mirələmovun "Gəlinlik paltarı" tamaşası ilə açılacaq.
