Parisdə Azərbaycan filmləri nümayiş etdirilib

F4Media.az xəbər verir ki, Azərbaycanın Fransadakı səfirliyinin Mədəniyyət Mərkəzində “Parisdə Azərbaycan kino günü” keçirilib.

Azərbaycan Kino Agentliyi və Azərbaycanın Fransadakı diplomatik nümayəndəliyinin təşkilatçılığı ilə keçirilən tədbirdə ölkənin kino və animasiya sahəsindəki yeniliklər barədə məlumat verilib.

Azərbaycan Kino Agentliyinin baş direktoru Rəşad Əzizov kino və animasiya sahəsində fəaliyyət göstərən studiyaların və layihələrin sayının artdığını bildirib. O, bu sahənin inkişafı üçün digər ölkələrlə əməkdaşlığın genişləndirilməsinin vacibliyini vurğulayıb.

Tədbir çərçivəsində “Bir yağış altında”, “Bum-Bum” və “İsi və Piti” cizgi filmləri, həmçinin XIX əsrin tanınmış Azərbaycan rəssamı Mirzə Qədim İrəvanskinin həyat və yaradıcılığına həsr olunan “Cənnət yuxusu” sənədli filmi nümayiş etdirilib.

Rəşad Əzizov Azərbaycan filmlərinin Fransada nümayişlərinin gələcəkdə daha da artırılacağına ümid etdiyini bildirib.

Mənbə: azernews.az