Netanyahu sürücüsü ilə əlaqəli avtomobil sifarişli qətlin hədəfi olub
Aşkelonda Benyamin Netanyahunun sürücüsü adına qeydiyyatda olan avtomobilə atəş açılıb. Polis hadisəni tanınmış kriminal avtoritetin oğlu Mor Domeraninin sifarişli qətlinə cəhd kimi qiymətləndirir.
Qurban Qurbanzadə1 dəq oxunuş
İsrailin baş naziri Benyamin Netanyahunun sürücülərindən birinin adına qeydiyyatda olan avtomobil Aşkelonda atəşə tutulub. Hadisə sifarişli qətl cəhdi kimi araşdırılır. Bu barədə N12 məlumat yayıb.
Polisin məlumatına görə, hücumun hədəfi İsrail mütəşəkkil cinayət aləmində tanınan Şalom Domeraninin oğlu Mor Domerani olub. İlkin olaraq hadisə ilə bağlı 9 şübhəli saxlanılıb.
Hücuma məruz qalan avtomobil baş nazirin ofisində çalışan və daha əvvəl Netanyahu ilə bağlı korrupsiya işi üzrə ifadə vermiş sürücü Boaz Assayaqın adına qeydiyyatdadır. Lakin hadisə zamanı avtomobil Netanyahunun rəsmi kortejinin tərkibində olmayıb.
İstintaq müəyyən edib ki, avtomobili Assayaqın oğlu idarə edib, salonda isə Mor Domerani və digər şəxslər olub. Polis hesab edir ki, atəş məhz Domeranini öldürmək məqsədilə açılıb.
Hadisə zamanı avtomobildə olanlardan heç biri xəsarət almayıb. Onlar ərazidən uzaqlaşdıqdan sonra avtomobil “Erez” keçidinə gəlib və burada polis tərəfindən saxlanılıb.
Axtarış zamanı Assayaqın oğlunda travmatik silah, avtomobildə isə polis identifikasiya papağı və xüsusi yanıb-sönən işıqlar aşkarlanıb. O, ilkin saxlanılan 9 nəfər arasında olub.
Sonradan şübhəlilərin bir hissəsi ev dustaqlığına buraxılıb. Avtomobil isə hadisənin bütün hallarının müəyyənləşdirilməsi üçün polis tərəfindən saxlanılır.
İstintaqın əsas versiyası hücumun Mor Domeraninin öldürülməsinə yönəlmiş sifarişli qətl cəhdi olmasıdır.
Mənbə: azernews.az
